窗口式冷氣機﹑窗口式分體﹑洗衣機﹑微波爐

朋友女介紹咗一間電器鋪都幾平，我哋差唔多一次過買晒全屋電器

廳用窗口式分體：

Panasonic樂聲牌　CS-C12JWA　1.5 匹 　

二級能源標籤，e-ion空氣淨化

$4430 (不包安裝)

大房窗口機：

Panasonic樂聲牌　CW-C710JA　3/4 匹 　高冷凍效益 (COP) : 2.85

一級能源標籤，Super alleru-buster 多功能過濾網，抗敏、抗菌、防霉，防銹藍鑽保護層散熱器，比一般散熱器耐用三倍，擺動式空氣循環

$2000 (不包安裝)

細房窗口機：

Ryoden 菱機牌　RB07AL　3/4匹　冷凍效益 (COP) : 2.82

一級能源標籤，兒茶素靜電過濾網，環保防銹藍塗層四面送風系統，自動搖擺送風系統

$1580 (不包安裝)

上置式洗衣機：

Brandt 白朗　WTC96100　原產地：法國　6公斤　1000轉

$5150 (不包安裝)

微波爐：

Panasonic樂聲牌　NN-S235WF　容積：22L　火力：800W

輕觸式操作，具超速解凍功能，二款 "一按食譜烹調"，自動翻熱功能，兒童安全鎖

$750

以上全部電器包送貨。因為裝修師父會幫我安裝，所以唔洗電器鋪裝，如果唔係應該可以再平啲！

裝修 Day 21～馬賽克企缸攪掂﹑換鋁窗

馬賽克企缸終於鋪好喇，我冇上新屋，牛牛影咗好多相比我睇，都幾靚吖，不過用黃色燈會令紫色偏紅，所以第時浴室會用白色燈！！

企缸地下都攪掂，同馬賽克一樣用咗灰色掃口粉，不過唔係好覺眼，好似同白色差唔多！



之前喺大陸見到個心型地漏，諗住問吓cf 啱唔啱用，點知佢好快手已經幫我整咗個老土款地漏喇，算啦．．．



就係呢個喇，幾得意！



全屋換晒鋁窗，都係standard款！本來想做白色鋁窗，好似感覺乾淨啲靚啲，不過要比多二千幾蚊，都係算吧啦！

之前揀嘅心型窗花，唔知係咪個窗太長，好似唔係好心型！cf 話原來我揀呢個款貴啲，不過佢冇加我錢喎！





尋日去咗沙田名華軒諗住睇吓芝華仕梳化，之前有blog友仔話減價三座位 $3xxx，不過已經係月頭嘅事喇，我哋去到已經冇晒，$4xxx 嘅款都冇，睇嚟都要去番九展嗰間買！跟住過咗一田，多人到好似行年宵咁！買咗個電蚊機，可以滅蚊﹑滅鼠﹑滅爬蟲﹑滅小強！原來就係另一個blog友仔買咗嗰隻，特價$225，sales話可以長插，最少用5年，under 500呎兩房一廳都夠用，我見好多人買，有啲仲買兩個添，咁我又唔執輸買咗個，希望真係有效就唔洗整蚊網啦！

裝修 Day 19～北上換馬賽克﹑買花花門鎖

為咗安全起見，今日同牛牛親自拉車仔攞啲馬賽克上去換，雖然只得14塊一呎ｘ一呎，不過超重，我唔夠力拉架車仔，所以全程由牛牛負責，真係辛苦晒！我哋仲要晨早去新屋攞番舊嗰批馬賽克先搭車上去，原來觀塘搭大巴去皇崗要$37一程，平時太子搭有優惠來回只係$55！今日返到香港仲要轉的士去新屋，又比多$18！

好彩淨紫色效果都ok，雖然冇咁閃同埋少少dry，不過襯白色浴室牆應該都幾好睇！換咗呢批新貨比之前細粒少少，老闆送多一塊比我，不過諗諗吓佢應該送2塊比我先啱數！算．．．唔想再煩！！星期一鋪馬賽克喇，好期待哩！

買多咗4盒掃口粉，$18@



仲買咗3個花花門鎖，$50@，揀咗粉紅＋紫色花花（張相唔係我架！）



之後又去尋燈，因為客廳同細房燈未買，之前睇中嘅款好似太大，不過行多轉家合居同五方都睇唔啱！都唔知點算．．．．．．

本來想買埋門頂﹑門較同掛勾，不過牛牛已經支持唔住喇，唯有下次傾廚櫃細節先再睇啦！

裝修 Day 18～鋪浴室地台﹑整電線﹑換電箱

浴室地下都鋪好喇，玫瑰暗花都幾靚，睇睇吓呢隻啡紅色好似仲襯紫色馬賽克，真係錯有錯著！

錯咗嘅電制位都改好，移番落下面



換咗新電箱，電線都整得幾快



間屋好似亂葬崗．．．



細房變咗離物房．．．

裝修 Day 17～鋪浴室牆磚﹑鑿牆整電制

開始鋪磚喇，Yeah！終於有啲嘢睇，雖然只係鋪咗一半！浴室牆身用白色波波磚，一行凹一行凸，好得意呀！感覺好乾淨，不過唔田園囉！

“博”位啲磚好似界得唔係好靚，牛牛話鋪完之後唔係好覺，係咪真架！？

全部電制位鑿晒，電線就梗係未整啦，不過TV wall 嗰四個位點解咁高？之後插DVD﹑cable ﹑NOW啲線咪見到晒！！聽日又要叫cf 改！

裝修 Day 16～繼續泥水﹑批灰﹑揀窗花

一早cf 打嚟問我哋波波磚點鋪，仲以為今日就開始鋪，原來只係浸緊，係喎．．．唔就得咗啲磚要浸添！cf 就收咗工喇．．．

佢哋掠乾水喇！



唔睇真啲真係唔知cf今日做過乜，原來係批灰，仲自備掛窗牛角扇～～型！



廁所又整咗啲黑蚊蚊唔知係乜，所以「不准進入」！



cf 放低咗窗花圖紙比我揀，原來有blog友仔隻心心款（右下角第三隻），我之前問cf 又話冇！不過客廳用心心驚太fancy，cf 又話好少人會廳﹑房唔同款，同埋怕屋苑唔准，我哋嗰度唔知得唔得！所以最後揀咗一個心款（紫圈），好唔好呢？？定係（紅圈）花紋田園啲呢？

仲有馬賽克間嘢終於都覆咗我，唔係．．．係我打上去追佢！好彩佢都知衰，話hold住其他order即刻做咗比我先！星期六就可以上去換喇，不過安全起見，都係唔拼色喇，費事做出嚟又唔啱又唔靚，改咗全部用晒深紫色！淨紫色係dry啲又冇咁sharp，不過勝在穩陣！！可惜佢隻紫色有少少偏紅，同睇色版隻深紫色有啲出入，算啦，都唔會有辦法架喇～～

裝修 Day 15～廁所泥水﹑砌企缸

馬賽克間嘢都唔係路，send 咗兩次email 都唔覆，聽日再唔覆我就直接打比佢！

今日cf 好勤力，8點先收工，上到去仲見到佢做緊嘢，廁所泥水整咗大半，企缸都砌好，不過企缸比想像中細，因為有條好高嘅“博”，係原裝已經有，唯有用嚟放洗頭水沐浴露囉！

原來啲磚都幾多，廳又有﹑房又有

不過睇睇吓．．．點解啲磚大部份都包實晒？牛牛尋日又話check晒冇爛又啱數．．．．．．原來佢只係對過冇送漏貨﹑睇過“外露”嘅磚冇爛﹑同埋拆開兩盒馬賽克！咁究竟其他磚係唔係我要嘅磚呢？？我話唔得，一定要拆開睇，oh．．．第一盒已經錯咗！廁所地磚明明要深灰色，而家變咗啡紅色，牛牛仲堅持話係深灰色，激死！



我本來要左邊第二隻，而家變咗左邊第一隻！唯有安慰自己～～啲花紋現啲喎！！不過廳地台隻淺灰白色真係好靚哩！cf 都話係貴嘢喎！希望鋪完出嚟效果都係咁靚啦！



牛牛又話尋日同cf double confirm咗電制位，total 24個，但係我又明明記得係25個，今日我自己數一次，係廚房漏咗一個！cf 話聽日加番一個冇問題！

唉．．．．．．連牛牛都唔生性！我真係好累呀～～

裝修 Day 14～遲來的磚．．．嬲ｘ10000

上星期日喺深圳訂咗磚，本來話尋日（星期日）送到香港，會有人打電話比我，結果電話收唔到﹑send email又冇人覆，到夜晚先有人打嚟話星期一到貨，我哋話要送埋上樓（當然要加錢！盛惠 $500！），電話中人話ok，不過送上樓就要安排晏啲先送比我哋！

我今日公司有嘢做唔方便請假，唯有牛牛自己一個攪掂！下午收到牛牛SMS話有三個cf 一齊開工，一個整埋幅牆﹑一個整水喉﹑一個整電線，咁高效率，good！

幅牆攪掂



廁所水喉攪掂



電線整緊



廁所天花拆咗之後見到生晒锈，cf 話應該係樓上漏水，不過而家叫樓上整嘅，佢哋9成9唔會啋我哋！唯有暫時唔理佢，不過三年後一定爆！！到時先算！無奈．．．



隔咗半個鐘再收到牛牛SMS話啲磚到咗，運費$400，不過送磚工人趕住送下一單，比錢都唔肯送上樓，激死ｘ1000！cf 又出咗旺角買嘢，另外嗰三個水電cf 都唔肯幫手搬，激死ｘ10000！！

好彩喺牛牛好徬徨之際，cf 番嚟求佢一命！其實cf 都係細碼size嗰group，呢啲粗重嘢都係唔啱佢，萬一整傷咗幾日開唔到工都唔知點算！所以佢都係急call個行家嚟幫手，只收$400（因為cf 教我哋講價，本來開價$800！），原來個行家就係裝修Day1勁快手拆晒全屋嘢嗰個cf！牛牛話佢幾好，就住就住好輕力搬，不過又幾快手，熟手技工都要大半個鐘先搬得晒，因為每扎磚廿幾三十公斤，有成三四十扎，呢$400抵比！！

不過初步驗完貨之後火都嚟埋！本來好開心，因為啲磚好乖，一塊都冇爛！點知一拆開盒馬賽克真係想喊．．．最貴嘅紫色馬賽克完全唔係我要嘅嘢！！又話50%深紫色，而家得番24%，其餘嘅唔係深淺灰，係銀色，完全唔襯唔知想點！！番到屋企即刻send email問換貨要點做，冇錯，係問換貨要點做，而唔係問佢可唔可以換貨！！不過我諗都係凍過水！cf 一見到啲馬賽克仲話香港買要成舊水一塊，雖然我買$48@，但係夾埋都成七百蚊架！！最慘係唔知有冇得換﹑又阻慢進度！！本來聽日就開始鋪磚，而家都唔知點算～～～

我唔中意嘅馬賽克．．．

後記：

即將上深圳買磚嘅朋友，記得問定cf 會唔會幫你搬磚先好買！而家啲運輸工人有錢都唔賺，真係吹佢唔脹！咁啱我個cf 又係瘦弱嗰group，好彩佢都call到人幫手，仲要平靚正，如果唔係真係企咗喺度唔知點算！！

仲有千其唔好自己拼色，現成有咩款就揀咩款，如果唔係就貼錢買爛壽，真係一萬個嬲！！