confirmed MUA

之前4次免費試妝都係麻麻哋，今次第一次比錢試妝都係麻麻哋，不過都confirm咗！佢就係 Joey 喇．．．揀佢試妝係因為見佢嘅閃閃眼妝化得幾自然幾sharp，同埋有我中意嘅蝴蝶髻！最緊要係快手and價錢平！其實join咗之後有啲擔心﹑有啲後悔．．．．．．所以咁多日都未post呢篇blog．．．．．．

嗰日試咗2妝2頭，連埋影相吹水嘅時間within 3hrs，都算快手！其實影相影咗好耐，因為佢唔同之前嘅mua有自己studio ，有晒燈光效果影慣影熟，佢係借人地方試妝，啲燈太光太白，影極我個眼袋眼圈都好勁！見佢個blog都唔會放試妝相，全部都係big day出job嘅相！

第一個妝可能隻eyeshadow唔啱我，Joey話係可可色（即係啡啡灰灰），化到隻眼好腫／無神！假眼睫毛唔夠密，又係眼尾加長款，對眼會冇咁圓，同埋假眼睫毛貼得唔好唔夠翹！Joey話佢website有好多款比我揀，不過到時我可能會自己買！仲有唔知點解冇畫eyeline！

第一個髮型亦唔襯我，又係我自己要求整嘅側髻，其實Joey set呢個頭幾靚，側邊／後面都有嘢睇，不過捲起啲蔭顯得我塊面勁圓！（係先天性缺憾！）其實上次free trial 之後已經知道側髻唔襯我，只係我唔心息要試多次！所以big day我都係揀第二個髮型喇！蝴蝶髻都係冇試到，Joey都覺得我全晚得一個造型就唔好整蝴蝶髻，其實而家諗諗吓．．．我都係想整呀！

第二個造型係包包髻，註冊都係莊重啲穩陣啲好！頭飾仲未揀定，但係試妝呢個髻整得太大，big day我會叫佢整細啲，同埋側邊都係留番啲蔭好睇啲，用嚟遮住我塊方包面（方方面＋包包面）！眼妝加咗深紫色，順眼咗！

一邊係金色閃粉，一邊係銀色閃粉．．．現場好閃，不過big day我未必會整得咁誇張！

confirm Joey係因為佢快手and nice，同埋我唔想比試妝費，我淨係化早＋晚，試妝費都要$480好唔化算！我見佢blog啲妝都幾靚，可能試妝嗰日佢遲到我又趕時間，所以唔係好認真！有blog友仔話Joey同Triangle Mona嘅技術好似，希望到big day有驚喜啦！不過如果到時真係都唔ok我咪自己執吓囉！

值得一讚係Joey修眉幾好呀，好有心機，我高低眉都攪得掂！Good！

Joey blog
http://hk.myblog.yahoo.com/makeupjoey

我的低能DIY．．．戒指枕＋相架

好多blog友仔都努力為自己婚禮DIY，造出各種獨一無二嘅婚禮用品，自問零藝術天份嘅我，整完個醜樣花球同埋求求其Monchhichi襟花之後，我已經再冇勇氣學人DIY喇！ 不過想慳錢，都唯有自己出一分力啦！

第一樣低能DIY就係註冊戒指枕，用PN送嘅bear bear熊改裝而成（咁都算改裝？），用紫色閃石貼咗 “P”and “C”喺煲呔and 裙仔，P=Phoebe，C=Chris（唔係Cow呀！），閃石貼紙係N年前深圳買$3，旺角賣$10一張呀，真係搶錢！再用紫色絲帶綁住戒指，深水埗買$3一包有5碼。最攪笑係牛牛隻戒指太粗身太重，綁極都綁唔穩，綁得太實又驚到時解唔到！攪咗好耐先綁得咁靚咋！（其實都唔係好靚！）

閃石貼紙，方便易用啱晒我！

我之前話好想要嘅摩天輪相架終於都買咗喇，喺淘寶搵咗好耐先搵到！可憐．．．．．．原來淘寶叫“旋轉相架”，rmb$68+運費$18＝rmb$86
http://item.taobao.com/item.htm?id=4639591375
其實收到好耐喇，不過要自己晒相，所以一路冇post出嚟，實物同圖片一模一樣，質量好好，可以放12張2R，不過實情係細過2R！所以要自己用cutter界，真係手都軟埋！

一邊放法國婚紗

一邊放台灣

旁邊個相架亦係我的低能DIY之一，去Jusco十蚊店買咗個4R全白色相架，再貼埋紫色閃石，攪掂！！

30 days Countdown

眨吓眼就剩番30日，都仲未有緊張嘅感覺，不過唔想咁快到big day囉，我驚過咗big day之後會好失落．．．上網唔知睇咩好，寫blog唔知寫咩好，搵工又唔知搵咩好．．．．．．

都係唔諗咁多喇，開開心心去完honeymoon先算啦！

淨番嘅未完成 items只有租7人車同埋plan rundown．．．．．．其實都冇咩好plan！

honeymoon準備二～比尾數＋沙灘裝＋sun block

終於都比咗Maldives package尾數喇，安樂晒！

6月book咗package之後，本來agent話上個月尾要比尾數架，但係佢又冇email資料比我喎，到今個月中都冇聲氣，真係驚驚哋架，如果book唔到咪弊傢伙！！所以我上星期主動投案，打比agent話我要比尾數，事隔兩個幾月佢仲記得我喎，唔通我當初講價太狠！　不過佢可能太好生意喇，話email比我都等咗個幾星期，真係急屎人！早兩日終於收齊 invoice﹑voucher﹑比埋錢，放心晒！

返到屋企即刻嗱嗱聲摷番啲沙灘裝出嚟，揀定衫去Maldives影靚相！ 雖然沙灘裝我有大量，不過多數都係背心短褲，方便嘛！但係今個夏天大熱嘅花花裙咁吸引，我又點可以唔入手呢！買咗三條長裙，家姐話借多條紫色比我，Yeah！

仲有花花短褲防走光！

以前每年夏天都會買1-2套泳衣，因為次次去旅行都想有新泳衣影相，所以而家儲埋有十幾套．．．呢套上年買嘅黑色lace通花Bikini仲未著過，第一次買淨色泳衣，可以帶去馬爾代夫扮有型！嘩哈哈．．．

諗住帶多三套colourful 嘅去，仲未揀定呀！！

仲有同陽光玩遊戲不可缺少嘅sun block，呢隻Anessa perfect UV sunscreen EX SPF 50+ 防水防汗，游水用啱晒！Sasa買 $203

仲有一個月就出發喇！！Yeah～～

過大禮～簡單version

其實上星期已經過咗大禮，不過我冇份參與，人哋話未來新娘子要回避，所以我就去咗試妝！不過牛牛唔聽話，叫佢幫我影相，佢只係影咗兩張果籃，激屎人！

同大家分享吓我哋嘅簡單版過大禮啦！
過大禮物品清單：
1．4式海味～花膠/乾瑤柱/冬菇/罐頭鮑，每款兩包
2．龍鳳餅兩對
3．奇華唐餅一盒～金緣喜禮盒
4．西餅卡ｘ50﹑唐餅卡ｘ30
5．生果籃
6．包羅萬有利是
7．禮金

海味方面亦都可以選擇魚翅﹑魚肚﹑蝦米﹑蠔豉﹑髮菜等等，人哋話一定要有髮菜，不過我唔中意食所以冇買！
龍鳳餅／唐餅要4-5日前預訂，有盒現成大大盒好似好睇啲，如果有親戚參與過大禮就可以一齊開嚟食啦！可以用餅卡埋單，我哋買少咗餅卡所以比cash，即係買貴咗！
餅卡﹑禮金嗰啲之前已經同媽媽傾好咗數目，全部放晒入禮金盒入面！（禮金盒係奇華免費的！）
至於包羅萬有利是就豐儉由人啦，有人話最少$500，又有人比幾千！但係我哋買咗海味，所以包羅萬有利是唔會比好多囉！同埋回禮用嘅利是封已經預早比咗媽咪喇！

過大禮當日牛牛同牛爸中午出發去到奇華攞餅，之後到我娘家樓下生果檔買果籃，中size $280，樓下買唔洗攞咁遠嘛，好鬼重架！樣樣生果執啲咩款冇所謂，不過要雙數！去到我娘家咪同媽咪分贓囉，咩都一人一半，由於對龍鳳餅只可存放7日，所以要放入雪櫃等上頭時用（blog友仔教嘅！），不過牛牛攞返男家嗰對餅好似比佢阿媽食咗！！

媽咪收完貨就回番三封利是比牛牛，一封包羅萬有（即係咩鬆榚、煎堆﹑扁柏﹑檳榔．．．總之我唔食又冇用嗰啲！）﹑一封代替女婿禮物（即係長褲﹑銀包﹑皮帶﹑鞋）﹑一封回禮利是，交收完佢哋就齊齊去飲茶喇，牛牛報告話當日氣氛十分融洽！梗係啦，媽咪都唔知我哋會買咁多嘢，佢仲唔開心晒！！

其實我哋由最初計劃餅卡＋禮金＋包羅萬有利是，到而家又海味又果籃已經好唔簡單架喇！！本來我想買埋茶葉（敬茶用）﹑酒（婚宴當晚飲），不過牛牛話屋企有唔洗買，媽咪又冇要求所以又慳番！我哋連龍鳳燭﹑對聯都冇買，因為唔會掛對聯／囍字牌，上頭亦唔會點龍鳳燭！其他skip嘅 items仲有無數咁多，椰子﹑雞﹑豬﹑魚﹑酒．．．．．．所以最好都係預先問吓媽咪有咩要求先，記得問埋嫲嫲呀！如果大家又要買又唔想煩，咪去金都買個過大禮禮籃＋回禮禮籃囉，幾百蚊咩都有齊啦！

婚紗晚裝造型

個個新娘big day都有567個這造型，但係我只有兩個～婚紗＋晚裝，為免第時唔敢睇番自己big day啲相，而家就要做定功課，搵定自己喜愛／適合嘅造型先！之前pre-wedding／試妝都整過好多造型，發覺都係簡單啲啱我，同埋唔好放頭髮落嚟啦！

婚紗造型好多人都揀包包髻，比較清雅高貴（不過我唔會整到勁高勁大嗰種！），頭飾選擇亦好多，皇冠﹑蝴蝶﹑閃石頭cool﹑珍珠頭cool等等，我就幾中意下面個蝴蝶頭飾！但係我整呢類造型會唔會太成熟呢？

另一選擇係用花花頭飾，比較young，我會用假花，方便嘛！台灣pre-wedding都整過，用粉紅玫瑰，如果註冊我就會揀白玫瑰或者白玫瑰＋紫色繡球花．．．定係試吓新造型好啲呢？

仲有我好中意嘅花花側髻，不過上次試完妝之後又覺得唔係好啱我，可能我個頭太大！同埋唔係好襯頭紗，如果襯晚裝加紫色繡球花好唔好呢？

而我最想試嘅就係蝴蝶髻！襯晚裝幾特別，但係第時睇番會唔會覺得“娘”呢？

免費試妝～take 4

尋日又去咗試妝，今次好過之前嗰三次！雖然唔係“叮”一聲，不過幾順眼，都似番平時化咗妝嘅我，精神得嚟唔係勁濃妝厚粉，黑眼圈眼袋都遮得幾好！不過只係試咗一個髮型（因為free嘛！），就係跟佢個blog嘅相一樣～側髻＋仿真花，原來相入面個新娘係短髮，而我係勁長髮，但係都可以整到差不多效果喎，我覺得ok囉！個髮型幾自然，不過都係遮唔晒包包面，我都知好難遮得晒！

其實我每次都係同mua講要精靈大眼﹑塊面瘦啲（相信個個新娘都同我一樣！），好多mua都會畫長啲eyeline﹑黑啲下眼線，但係我唔中意囉！今次對眼就化得唔錯，有少少smoky，我要求下眼線唔好咁黑都ok，同埋對假眼睫毛好靚，好濃密但唔係勁誇張！最可惜係隻紫色eyeshadow唔係我想要嘅，有少少偏藍！可能佢想襯番借比我影相件藍色晚裝！（佢冇紫色晚裝！！）

呢幾張相係用我部傻瓜DC影嘅，唔知點解影到我咁黑．．．

下面啲相係用佢部單鏡反光機影，不過佢打咗白燈（好似影樓有把遮嗰啲！），現場睇個妝冇咁白！同埋個髻唔夠側，我想前面都睇到髻and花！

個髻似乎太大舊，都係剪短啲頭髮好啲！

原來今次呢個mua同免費試妝～take 3個mua係partner呀！佢哋成日一齊出job，佢仲睇過我上次嘅試妝相，又問我點解上次唔join．．．好似有啲尷尬囉！

佢而家冇免費試妝喇，試妝$300，下年要$400呀！註冊妝 $980，早晚兩妝兩頭 $1800，價錢好抵！不過我仲未confirm佢，大家覺得ok嗎？

過大禮準備～簡單變麻煩

下星期三就過大禮喇！原本我哋嘅過大禮超級簡單，諗住淨係餅卡＋禮金＋包羅萬有利是就攪掂！點知嫲嫲同媽咪突然間越嚟越多要求，攪到呢幾日要四出補貨！

上個月已經叫牛牛嘅家姐嘅朋友幫手買咗60張美心西餅卡，有員工優惠7折！另外問朋友仔借教協卡買咗20張奇華金雅喜唐餅卡$52.5@，點知早幾日媽咪突然話計錯數要加多10張！費事又麻煩朋友，唯有自己去分店買，sales姐姐話買20張先有95折，下次8折要到11月婚紗展！oh．．．11月我都嫁咗lu！咁唯有正價買啦，$65@好貴！

嫲嫲話過大禮一定要有兩對龍鳳餅，唔可以用餅卡代替，同埋朋友仔話買多盒大嘅嫁女餅好啲，咁我買餅卡時就多口問sales姐姐唐餅係咪一定有現貨，原來要5日前訂呀！真係好彩問多句咋，唔係到時過大禮冇龍鳳餅實比嫲嫲鬧鬼呀！仲有問sales姐姐攞咗個禮金盒，唔洗錢架，係紙盒不過都幾硬淨！另外有一款係木盒畫晒龍鳳，好靚好大體，不過要比$200 deposit借用，我唔洗要咁靚啦，用完又要還咁麻煩！

尋日放工就去金都買埋啲原本以為唔洗買嘅嘢．．．雙囍茶具﹑囍字紙杯﹑男女上頭套裝﹑囍字利是封﹑禮金利是封﹑包羅萬有利是封。右下角就係奇華free嘅禮金盒，可以將禮金餅卡放晒入去！

茶具套裝有好多款，我揀呢款有雙囍有心心有鴛鴦，唔娘唔老土（我覺得！），不過$118用一日都幾貴！

媽咪話上頭時著嘅新睡衣唔一定要買金都款（即係鮮紅色絲質），紅紅哋or粉紅都冇所謂，我中意咩款都得，嘩哈哈．．．我即刻“叮”一聲叫牛牛同我去女人街，買咗套老翻Melody，盛惠$39！雖然金都姨姨話二奶先著粉紅色，不過我冇所謂，反正我係大婆！！嘩哈哈．．．．．． Melody睡衣之後都可以著唔會嘥，平靚正！我真係知慳識儉！

今日就去咗買海味，象徵式買少少啦，我哋又唔識又驚比人搵笨，所以唔敢去海味鋪買，本來想去東方紅，不過好貴呀又好細盒，最後行咗過隔離官燕盞，買咗花膠﹑乾瑤柱﹑鮑魚﹑冬菇，咁就冇咗幾千蚊！