pre-wedding banquet

今次唔係pre-wedding photos呀！係pre-wedding banquet！！點解？因為牛牛公公行動唔方便，我哋大婚之日唔會嚟食飯呀，所以我哋今晚要另外擺兩圍for牛牛公公婆婆family！

得兩圍親戚食飯，當然好casual啦，著返平時返工衫就ok，今晚冇搵人化妝喇，不過都要有個靚樣唔好失禮人嘛，咁就自己動手啦！

有冇人結婚casual得咁交關!!??有啲親戚仲著得隆重過我哋，阿未來99仲set晒頭添，真係唔好意思．．．．．．

honeymoon準備三～bubble bath＋hair treatment

仲有4日就出發去Honeymoon喇，呢幾日狂煲blogger嘅馬爾代夫遊記，好期待哩！

既然有個望住大海嘅浴缸，當然要浸番個泡泡浴啦！其實每次旅行之前都例必去Lush走一轉，Lush嘅Bubble Bar又多選擇又香噴噴又夠多泡泡，最鐘情都係蜜糖拖肥泡泡浴芭，又香又滋潤！今次仲買咗爆炸花泡泡浴芭﹑心平氣和泡泡浴芭﹑和諧心靈泡泡浴芭，盛惠$224。4個唔同款，4晚inocean villa啱啱好！第一晚住Holiday Inn，去到已經零辰，應該都冇心情浸bubble bath啦！

http://www.lusheshop.net/index.php?option=com_virtuemart&page=shop.browse&category_id=44&Itemid=83

幾日都浸住海水，我一頭就嚟壞死嘅煩惱絲都要保養吓，行開 Jusco見到Pantene Clinicare特價，即買！急救修護精華10支送旅行裝洗髮乳＋潤髮乳，原價$89，而家$50咋！！細細支帶去honeymoon啱晒！

男禮＝皮褸？？

牛牛一直堅持big day著得casual啲，由最初恤衫老牛變為恤衫西褲已經好難為佢！ 點知劇情發展係牛牛嘅婆婆下旨要佢買西裝，仲封埋利事比佢買衫！但係我又覺得買西裝好嘥喎，佢返工唔洗著，有一套看門口已經ok啦，所以我就提議買皮西裝褸，平時出街／返工都著得！

行晒成個尖沙咀睇咗好多款，牛牛都係鐘情bauhaus（唔貴都唔揀！） 多謝朋友仔X小姐幫我哋攞到7折，原價$4350，折後價$3045，好優惠呀！ 難得牛牛中意（佢好少中意咁貴嘅衫！）又有婆婆sponsor喎，咁就比佢扮吓型仔啦！

好彩天文台預告星期三轉涼，最低氣溫得19度，唔係實熱屎佢！！

又嚟淘寶頭飾

好趕呀．．．．．．仲有一個星期就到big day，仲未揀到心水頭飾，因為mua Joey提供嘅款式我唔係好中意，都係自己準備定穩陣啲！雖然Joey話新買咗個好靚嘅頭飾到時比我用，不過我想要蝴蝶款呀！！

我唔想揀啲太閃太誇張或者太pre-wedding feel 嘅款，例如羽毛﹑禮帽都no good！終於比我喺淘寶搵到個白色蝴蝶，好特別又唔係太浮誇，最中意佢對翼有兩層好立體﹑仲有少少閃石點綴！ 就算註冊唔用，第時影相都可以用吖！

最緊要都係價錢平，隻蝴蝶只係 rmb$12.8，不過順豐到付要$35，所以順手淘多兩個頭飾平時用，no蝕嘛！


紫色lace蝴蝶結髮夾rmb$3

紫色大鑽石橡筋rmb$1.8

賣家尋日下午發貨,我今朝一返公司未坐定就收到喇！ 呢個賣家啲貨品都幾特別，仲要全部實物拍攝，大家仲有pre-wedding未影嘅都可以睇吓喎！仲有我之前淘寶番嚟嘅蝴蝶套鏈佢都有，仲要平十蚊呀！！

http://ula-bride.taobao.com/

free pre-wedding preview

WM Law放咗7張相上website呀！不過我唔識save出嚟喎．．．．．．

http://www.fotop.net/COI/Phoebe_Chris

要有晒full set，我諗要下個月喇！都冇所謂啦，反正仲有一個星期就係big day，點都趕唔切架啦！以下呢張係我用最原始嘅Print Screen capture出嚟嘅！！

扮跳舞．．．好明顯我哋係扮啦！！

其實嗰晚影咗好少相咋，我哋9點半先集合，影到12pm就完喇，影完1881之後去咗碼頭同鐘樓嗰邊，鐘樓前面個水池比啲騎呢花燈遮住晒，我都唔知有冇影到鐘樓呀，話晒我同牛牛都一齊喺鐘樓前面睇過煙花架嘛！之後再行過去文化中心﹑星光大道，又大風又多人．．．可能我個靚靚髮型都吹到散晒喇！仲有冇影到馬路呀！！其實我好想影馬路架！！

free pre-wedding造型

影完 free pre-wedding夜景喇！不過啲相未有得睇住，比大家睇吓我個造型先啦！係Angie同佢朋友Vince嚟我屋企幫我化妝set頭，大約用咗兩個鐘，係慢咗少少，不過佢哋好有心機，我都好滿意，特別係個髮型，原本我要求唔放頭髮落嚟，因為之前試過唔好睇，今次Angie整呢個髮型又幾好喎，都唔覺得老咗！

個頭花係花園街買嘅，$10@，買咗兩個，估唔到帶上頭效果又幾好，同件晚裝隻紫色勁襯！ 蝴蝶閃石頸鏈就係之前淘寶買嘅，不過對耳環冇帶呀，好似太誇張，同個頭花又唔襯！

我個萬年眼圈＋眼袋真係．．．．．．神仙都難救！

件紫色晚裝真係好靚呀，超中意！

我發覺我真係肥咗呀！！！竟然有“豪華臂”！！！仲有十日就去Honeymoon喇，點影泳衣照呀！！

快到你唔信．．．淘寶婚紗收到喇！

淘寶件婚紗我前晚用支付寶比錢，賣家尋日寄貨，今朝就收到喇！佢梗係知我趕住嫁．．．唔係．．．係趕住著！所以咁高效率！順豐到付 hk$35都ok吖！

件婚紗同淘寶嘅相100%一樣，不過因為free size關係．．．個胸好似湯碗咁大！（係件婚紗唔係我！！）又要攞出去改喇，我唔會再去上次銅鑼灣嗰間，改一改仲貴過我買多件！大家有冇好介紹呀？

後面啲花花巢晒

竟然係自家品牌呀！仲有埋“洗滌說明”，勁！

裙尾好得意，唔知點形容．．．好似有條軟軟哋嘅鐵線邊咁，形成波浪效果！

拖尾嘅裙尾都係波浪邊．．．不過我塊地有保護色睇唔清楚！

真人示範．．．件婚紗未改，著到我肥咗兩個碼！！

好似5尺爭2吋咁．．．著番高踭鞋應該會順眼好多！

“影后”．．．仲係see-through添！

大家覺唔覺得張張相都打斜影？唔係懶勁唔係懶型．．．係因為牛牛今晚要OT，我被迫玩自拍！

以下就係我今晚嘅partner．．．隨機附送嘅超迷你腳架！不過我唔明囉．．．個腳架裝喺側邊，咁個相機咪唔平衡，唔平衡咪企唔穩，企唔穩咪會跌囉，咁我咪被迫整斜個相機平衡番囉，咁啲相咪張張都斜囉．．．大家明唔明我嘅問題？？即係用腳架就唔可以影四四正正嘅相囉！