有一日牛牛問我（佢終於都問喇^o^）：「係咪要買鑽石戒指比你？」(不過佢都冇話係求婚戒指！)，咁我就梗係話咗要先啦！(雖然我不嬲對鑽石嘅興趣不大！) 我亦都自己揸咗主意當係Ｅngagement ring！哈哈～～佢話budget 20-25k，咁我就諗：兩皮嘢買隻戒指，買咗唔啱心水點算！？又冇理由攞去換！咁不如穩陣啲我自己揀！聰明！！
牛牛份人咁穩陣就梗係贊成啦！咁我哋就落街window shopping，即係行旺角！以前聽媽咪講話可以講價，講到2折都得！吓？唔係呀化．．．2折？？我哋梗係唔係好信啦，話晒都唔同年代！但係我哋又唔識，咁究竟可以平幾多呢？
為咗唔想比人搵笨，咁我哋就冒住大出血嘅危險，叫媽咪同大姨帶我哋去買！(註：同親媽咪出街都大出血！大姨喺埋度仲事半功倍！！) 哈哈．．．真係不可思議，竟然係我屋企人帶我男朋友去買求婚戒指比我！呢個配搭都幾有趣！！
我哋飲完茶就上去，果度係大姨朋友開嘅，好似做批發啲廠咁囉，可以自己揀鑽石然後自己design個托叫佢鑲，咁就有隻獨一無二嘅engagement ring啦！佢都冇問我地budget／要求，一嚟就攞粒石出黎話：「呢粒新到好抵買！」，係GIA 83份，D colour，VS1，個面好大，望落好似成卡咁(誇張咗啲哈哈！)，好白，好閃！我哋四個都覺得幾好，跟住就問價錢，佢話$41000，吓！？唔係呀化．．．$41000？？得喇，有冇第二粒細啲唔該？點知計計吓佢話$41000係一卡嘅價錢，佢唔記得咗乘0.83，應該係$34000至真！咁我又覺得佢唔係有心棍我地嘅，應該係老花睇唔清楚啫！不過$34000都over budget啦！另外有粒74份，E colour，VS2，$25000，不過已經鑲咗做男裝戒指，佢話可以拆番出嚟比我哋睇清楚，唔知係咪鑲咗做sample比人睇得多，好似唔係好閃咁，佢話呢排好少70-90份，一係好細一係over一卡，咁我哋就再諗吓先！
夜晚牛牛問我係咪中意果隻，我梗中意啦(突然間愛上鑽石！)，不過冇諗過買咁貴囉！雖然係佢嘅錢，不過第日咪即係我嘅錢！我都肉赤架嘛！咁我就諗，如果真係買83份果隻，咁我哋喺其他地方慳啲cover番條數囉！咁我就提議，不如honeymoon唔去Maldives去番Boracay囉，橫掂我都想去第3次，最多住Discovery囉！不過牛牛reject咗！估唔到佢咁堅持要去Maldives(牛牛好少有意見！)．．．咁唯有再諗辦法！
唔止你呢~ 我都覺自己選穩陣d ma, 而且結婚唔買, 之後都無咁衝動會買(我自己都不太帶首飾), 但總覺就係要有只來求婚咁.....都唔知點解會有咁唸法 用咁多錢買, 梗係想買自己鍾意架啦......你已好好了, 我都仲未有人向自己求婚就已經忙餐死了 ...希望佢都真係會記得求啦~
回覆刪除[版主回覆01/17/2010 15:11:00]係呀!我都覺得求婚戒指好重要哩!!其實我都係籌備咗一段時間先等到求婚架!!得閒咪提吓佢囉!都咁熟啦,冇所謂啦,哈哈!
我隻求婚戒指都係自己揀0架, 哈哈...
回覆刪除因為我份人比較低 B, 大粒0既鑽石真係唔襯我,
同埋我個人比較孤寒,
要我老公用咁多錢買粒平時好少帶0既鑽石比我,
我真係唔係好捨得囉, 哈哈哈...
[版主回覆03/09/2010 10:44:00]係唔捨得架,一世人買一粒囉,冇take two喇~~
hello... 第一次到訪呀～～你好呀～ 我隻 engagement ring 都係我自己揀左個款，佢自己揀粒石～ 所以收到時都冇驚喜架，不過自己揀，個款一定鍾意啦～
回覆刪除[版主回覆12/04/2010 16:25:00]第一次買咁貴嘅嘢,梗係要揀自己中意啦!