睇樓第四擊

星期日我哋再走多轉麗晶花園，今次特登搭地鐵去，原來彩虹站行去屋苑外圍都要10分鐘，傳說中嘅8分鐘應該要行得好快！

我哋去另一間地產鋪話搵平價盤， ard150萬，低層都ok！ 睇咗5個，有一個2樓516呎開價165萬其實好抵，其他同size都賣緊180幾，不過呢間對住馬路，雖然係紅綠燈位同埋裝咗隔音玻璃，不過開窗有巴士經過都有啲嘈！ 因為我中意開窗，同埋474呎果啲單位都夠住，所以呢間都係唔考慮！

有一間agent只係帶我哋去參觀，無諗過我哋會買嘅，16樓474呎，全新豪華裝修連家電，基本上買埋張床同梳化，行入去就住得！原先業主搬咗去柏麗灣，而家呢度開180萬，講明最多減一萬！講價免問！！真係幾寸都有！ 其實179萬都算抵，買幾件傢俬就住得，可惜係呂字廳冇改間格，咁呢間又唔考慮啦！

另外兩間150萬左右，一間一樓一間二樓，一樓果間都ok喎!！下係公園，好清靜，另一邊窗係入園馬路要慢駛，所以唔嘈！不過佢有兩個窗都整咗防蚊網，應該公園多蚊啦，我咁皮薄餡靚又惹蚊憐愛！！好似都驚驚哋！ 不過可以行樓梯落街唔洗等 lift都幾好喎！但係我唔係幾like門口對住後樓梯囉，驚多人出入同倒垃圾，牛牛又話關門唔驚喎！

最後都係叫agent幫我哋搵啲4﹑5樓殘裝價錢平嘅！

之後我哋再行埋過啟業邨街市，原來3分鐘就到，仲有酒樓同好多鋪頭，隔離又有學校幼稚園，勁方便！之後再試埋搭巴士出尖沙咀，車程ard18分鐘，又係好方便！

睇睇下除咗返娘家唔方便之外都冇咩缺點！睇嚟九龍區應該都冇其他choice喇！