等咗3個月，終於都到我試衫喇！我同牛牛一齊請咗半日假，約咗5點，我哋4:30pm已經去到，唔洗等即刻有得試，咁大個女第一次著婚紗，仲一次過著廿幾條，好好玩呀！
之前一早上網 hold 咗二十件 wg+eg，一去到啲衫已經攞晒出嚟，不過Angelababy果條短裙無得試，因為有人著咗去影相，到我影果日先比番我試。仲有番到屋企先發覺佢比漏咗阿Sa果條吊帶玫瑰花我試，不過唔緊要啦，其實我都唔會揀吊帶，都係貪得意試吓啫！
幫我試衫嘅係Crystal，佢排好次序比我試，外景婚紗＞影樓婚紗＞晚裝，佢好nice and helpful 呀，每條裙都會解釋個design﹑有咩detail位﹑影出嚟咩效果﹑揀咩色好．．．因為外景婚紗我揀得3條，Angelababy果條短裙又無得試，即係得番兩條，所以佢另外揀多咗3條比我試，每條裙著咗出嚟都會比我企上個箱度照吓鏡﹑同牛牛商量吓，跟住就用DC幫我影張相，之後可以一次過睇番先慢慢揀，不過唔比我哋自己影相！
試晒廿幾條裙都係用咗個零鐘，之後啲相過晒落電腦就比我哋慢慢揀，Crystal行開咗做其他嘢，我哋梗係即刻攞自己部 DC出嚟偷影啦！因為counter仲有其他人喺度，所以都唔敢咁揚，只係偷影咗6張，就係我最後揀淨嘅6條裙，因為係偷影個mon，所以好暗！其實一路試我已經心中有數，外景婚紗﹑影樓婚紗﹑晚裝都分別已經揀淨兩條，total 6條，最後就要二選一﹑二選一同二選一！我嘅
選擇困難証又病發喇，最後玩咗半個鐘先揀到！
下面兩條係外景婚紗，第一條一早上網hold咗必選，因為個V字吊帶好靚，好elegant！點知第二條係Crystal加比我試嘅又好靚喎，有啲古典feel，外景著夠輕盈，不過有啲大肚feel，所以最後都係揀咗第一條！
呢兩條係影樓婚紗，11月wedding expo見到model行catwalk已經覺得好靚，又係二選一難題。第一條low-cut位有波浪，玫瑰花好young好特別，不過得一面靚，另一面冇咩款。而第二條有超大拖尾，大泡泡＋喱士，同埋上身有綱絲顯得瘦啲，所以第二條成功入選！
晚裝反而最難揀，上網啲款好娘好舊，得幾條靚！下面第一條就係之前我話因為“佢”即刻比錢join FB package！粉紅＋金色漸變，三層唔同效果，好young又唔太fancy！不過我一直都話要揀我最愛嘅紫色晚裝，下面第二條就係就係 my cup of tea！但個款高貴斯文啲冇咁young，咁點算呢？牛牛話呢個係唔止一百萬嘅問題 呀！(即係冇答案！)，Crystal 就suggest揀深色同我 like嘅colour，但我心入面又好喜愛 pink + gold，所以我決定．．．打電話問朋友！Ｘ小姐話pink ＋ gold台灣一定冇呢啲款，紫色唔揀又會後悔，所以決定加$500揀晒兩件！Yeah！！其實我都知加$500可以揀多件衫，只係想多個人十卜我啫！咁咪叫牛牛比我做醫藥費囉，醫我嘅
選擇困難証！！好嘢！有四件衫影相！
之後到牛牛揀禮服，好簡單，一黑一白，有啲要+$300 or +$500，out！其實唔洗加錢嘅款都唔差（好台灣好多！）下面第一件簡單啲，第二件浮誇啲，因為台灣冇浮誇款，所以第二件成功入選！我揀嘅！
白色禮服偷影失敗！以下係model相，哈哈．．．牛牛梗係冇咁型仔啦！！
跟住就sell我買鮮花球，八折咗都係5、6百蚊，包埋新郎襟花同新娘頭花，不過多數都係玫瑰，又冇咩紫色花揀，我又已經買咗絲花球，所以冇買到，跟住sell我淨買頭花$180，我又唔係特別中意鮮花，所以都唔買！最後講埋影相細節，提我哋要準備啲咩，成個過程兩個鐘攪掂晒！好快呀！！
後記：想join FB嘅朋友一定要去會展expo，唔係因為多啲嘢送，係因為有catwalk show可以睇新衫！可能真係太多人影FB，佢哋啲衫好快殘晒，08年嘅款已經變晒灰色，有啲仲染到紅紅哋／甩晒花！好彩佢哋啲款出得快，每次expo都有新款，如果睇啱可以即刻join，新款婚紗晚裝都可以揀！今個月expo又有新款喇，不過冇我份！！
期待4/3影相～～
