台灣婚紗相之旅～最後準備

仲有個幾星期就出發去台灣影婚紗相喇，今日終於confirm晒所有嘢！本來諗住FB出咗咁多血，都係揀間平酒店慳番幾百蚊去食麻辣火鍋，點知揀咗幾間都 full 晒！又唔想住啲好舊或者唔近捷運站嘅酒店，所以最後都係要揀番台北戀館，不過係另一間主題房－海底奇緣，$850一晚，有個幻彩雙人按摩浴缸好似好正架，不過就冇咗蒸氣房囉！而家機票﹑酒店連埋保險﹑簽證都係$5400，三晚酒店都好大又有浴缸，幾抵！

因為一落機就去非台揀衫好趕，所以都係上網整咗簽證先，去到香港機場攞，唔洗喺台灣排隊！

另外最煩就係plan行程，雖然只得一日半時間自由活動，但係由於我哋兩個都完全唔識路，所以要諗咗有咩地方想去，再不斷上網search地址﹑地圖＋問朋友！原來我想去嘅地方都唔少，好數都係食，影完2輯相我要放縱吓喇！！希望可以用盡呢一日半時間啦！

1. 肥前屋鰻魚飯

2. 上閤屋自助餐

3. 天外天麻辣火鍋

4. 新光三越買雞蛋布丁

5. 西門町隱世牛肉麵（因為間嘢冇名！）

6. 士林夜市

7. 美華泰流行生活館

8. 美麗華摩天輪

9. 五分埔

如果有時間仲想去埋太和殿麻辣火鍋同度小月添！（不過應該冇咩可能啦！）

至於影相景點都諗咗，不過我唔知邊度打邊度，都唔知啲地方近唔近！好彩blog友仔教我用google map計車程時間，勁！

A. 非常台北

B. 台北奧萬大－紅色楓葉＋木屋

C. 陽明山國家公園－唔知咩瀑布

D. 野柳－好似懸崖嘅地方

E. 萬里－海灘 / 藍白色風車＋牌坊（要比入場費NT$700，好似唔係好抵！）

F. 非常台北

來回車程2小時50分鐘，我諗應該可以去晒咁多個地方啩！因為唔想影咁多相同租咁耐車，所以大屯農場，夢湖，洋荳子咖啡館，Bossa Nova，情人橋，摩天輪夜景全部都唔去！同埋上一輯影咗戒指同紫玫瑰，今次唔帶去喇！早兩日買咗心形氣球同紫色花瓣，用嚟影室內景，佢哋嘅室內景＝白色冇景！！

今次目標係一蚊都唔加！！我要忍忍忍．．．