深圳尋寶之旅資料

好多blog友仔都問我深圳買嘢嘅資料，其實我上網做咗幾個月功課架喇，都係睇 forum 同埋人哋嘅blog，以下係summary加我嘅comment比大家參考。

羅湖路線

去寶安北路可以到”火車站西廣場” 坐61號大巴或是18號大巴
61號就在寶安北路口站下車，就正正是B&Q對面，過一條橋就到B&Q
18號大巴就在人才廣場站下車，過一條馬路就係好百年了

去田貝四路的話，在火車站巴士站坐１號大巴，在田貝四路站下車，就是在家合居門口，車費RMB2.00。認住自己向邊度落車，回程向對面搭返 1號車，如果冇記錯，應該係中國銀行門口。

皇崗口岸路線

坐大巴去皇崗方便啲，都有巴士去田貝四路，357 號大巴，上左車會有個人問你去邊落車再比錢買車票，同佢講要去田貝，車費RMB2.00，佢會話你知邊到落車近，要搭十幾個站，車程約半小時。落車後繼續向前行，到路口轉右再向前行就見到家合居。架巴士中途經過寶安北路都有站可以落，不過我唔記得咗咩站！



又一居燈飾城 - 八卦嶺八卦四路76號，三層高商場都係賣燈，有啲款係寶安北路﹑田貝四路冇架！由寶安北路or田貝四路搭的士去都係$10左右。我試過皇崗搭357號大巴去八卦嶺，落車之後上天橋過對面一直行一直行一直行，行咗差不多20分鐘，哈哈，下次都係搭的士！

寶安北路

田園傢俬 -「好百年」最貴，「香江傢居博覽中心」和「香江傢俱城」屬於中價，「金海馬家居」和「家之福」比較便宜。唔好諗住真係成個商場都賣田園傢俬，其實每個商場只有幾間鋪有得賣！有啲仲好貴，萬六蚊一張田園床都有，好誇張！「金海馬家居」G/F的<軒尼斯>好多香港人幫襯，價錢ok，不過佢係四四方方嘅韓式田園風，唔係我要嘅波浪浮雕款！

田園家品 -「超凡家居」改左名做「藝荗工藝品中心」，價錢比較大眾化，喺藝展中心一期隔離，「藝展中心一期」貴一點，「藝展中心二期」更貴，「超凡」賣的東西基本上跟「藝展一期」是一樣的，但開價便宜得多，議價空間亦較大，是尋寶好地方！

推介：碎花梳化墊﹑花花碗碟套裝﹑調味樽﹑手繪小櫃仔﹑手繪椅子﹑田園擺設

「家之福」-- 分為三部份，新「家之福」﹑「傢俱中心」和「原材料市場」。新的「家之福」係大商場，主要是賣傢俬，不過冇咩特別。「傢俱中心」是單層式劃分不同舖位，有賣sofa、衣櫃、座廁、牆紙、窗簾，價錢比較經濟，但店舖裝橫很「up dup」！「原材料市場」即係舊「家之福」亦是單層商場，分為A、B區，有磚﹑浴具﹑門﹑門鎖﹑鐵閘﹑五金配件﹑電制﹑燈﹑廚櫃﹑衣櫃等等，價錢比「家樂居」、「樂安居」便宜，推介買磚，選擇多﹑價錢平，買燈就冇咩款，去又一居燈飾城or田貝四路好啲！不過如果要求唔高又想平，「家之福」已經可以買晒全屋傢俬建材！

Useful Information

1.如果在幾間鋪訂了磚，可以把卡片交給其中一間店舖作coordinator，它們就會連絡其餘店舖各自上貨到同一架貨車一併送來HK，這樣可以省卻託運費用，1噸$250-300，送上樓double運費，一定要寫埋落單。
2. 落單時最多付1/3，其餘貨到後即場給司機。用港幣比錢，最好計咗個Rate先
3.可要求先到大陸驗貨，特別係訂造傢俬一定要驗！
4.有些無良商人會用平價貨冒充客人訂了的貴價貨。所以記緊訂了每款磚後用DC拍下磚的samples和記下磚的品牌，以作比較。磚送來HK時都會用箱子pack好，箱的表面一定印有品牌的名字。
5. 傢俬店舖標價/開價，通常是「實價」的一倍。如果discount非原價的50%，就要考慮清楚了~ 賣磚的多數報實價，冇咩議價空間。賣燈都好難講到半價，間間開價唔同，要試講先知！
6. 大陸買地磚是不會送地腳線的，店舖都會收取磨邊切割的「手工費」



田貝四路

主要行「家合居」同「五方家居裝飾材料廣場」，同寶安北路「家之福」賣嘅嘢差不多，不過裝修新少少﹑價錢貴少少。

燈飾比「家之福」多款同埋靚，行得舒服，仲有抄外國款式！記得要求加水線，國語叫“接地線”，用嚟防漏電架，要預留時間，佢地加水線同試燈要攪好耐，最好即時自己攞走。

洗手盤櫃可以訂造唔同款式尺寸，我問過訂造一尺半櫃連人造石枱面，七百幾蚊，運費都係按重量好似係百幾蚊，亦可以連埋其他嘢一齊運。另外，多數廚櫃公司都可以造埋洗手盤櫃，如果諗住造廚櫃都可以一次過造埋免度尺費，同廚櫃一樣係千幾蚊一米，鏡櫃加多百幾蚊。

Clipsal奇勝電制－大約係catalogue原價嘅57折

由田貝四路「家合居」去「五方家居」 -- 「家合居」的正門口出向右邊沿田貝四路往上行，約5分鐘後會見到"翠北小學"，再往上行便會見到田貝地鐵站的工程地盤，過馬路後再往上約5分鐘後便可去到「五方家居」，寶安北路打的過田貝四路，人仔16蚊左右。

~~~~~~~~~~~~~~~~~~~~~~~~~~~~~~~~~~~~~~~~~~~

田園廚櫃 - 最多人推介有兩間，一間係「五方」嘅<嘉怡廚櫃>，另一間係「家之福」的<歐森廚櫃>。我個廚櫃係7尺x4尺L形吊櫃加地櫃，用吸塑板、內裡大芯板、普通人造石枱面、一個櫃桶加拉藍、包晒天花封線、手抽、緩衝較、微波爐櫃、不綉鋼盤。

<嘉怡廚櫃> 五方家居211號2樓C區045號，$1480/米，如你唔再上去，佢會出圖紙email比你確認。嘉怡報價$5700+度尺費$300+安裝$2300+運費$500-$600（按重量）＝$8900

<歐森廚櫃> 家之福建材超市 A區三街80B，$1180/米，可以即時電腦出3D圖。歐森報價$5350+度尺費$300+運費連安裝$1900＝$7550

嘉怡雖然貴啲，不過有鋪頭同cf 喺將軍澳好似穩陣啲，但係一定要上深圳落單，香港店係收番香港價錢！

衣櫃 - 唔會大陸造，因為搵唔到一間多人推介造得好嘅鋪頭，好多間都比人話係黑店，又話送到嚟個櫃桶穿洞﹑又話比個舊櫃當新造﹑又話大陸 cf 砌唔掂個櫃中途走咗，真係咩都有！仲有計埋運費﹑匯率其實唔係平好多！如果睇啱現成款唔需要訂造都可以博一博，不過最好都係上去驗貨！

木門 - 唔會買，好多人話尺寸有問題，有啲有白蟻 / 蟲，好恐怖！！

座廁 - 唔會買。名牌例如Roca﹑TOTO都唔平，香港買好過。平嘢冇牌子嗰啲款幾靚，例如有印花，但係有人買過漏水！

深圳有九成商場都冇冷氣，要有心理準備！

下面條link都係講深圳買建材，有時間可以慢慢睇，不過有成百頁！！

http://comtools.esdlife.com/wedding_forum/viewtopic.php?t=160744&postdays=0&postorder=asc&start=860&sid=d44fcaf8afbcc2c13cc1f0819621a663