非常台北 BMW 影相日花絮一

擔心咗成晚，終於到咗影相日喇，瞓醒第一件事係開窗簾睇吓有冇落雨，冇雨，Yeah！不過亦都冇太陽！

8點就過到BMW另一個鋪位化妝，要落地牢，小雯已經等緊我喇！首先幫我搽補濕同埋敷眼，應該係安瓶，不過冇收我錢！所以我自己帶去嗰三支都冇用到！跟住修眉﹑搽指甲油同捲頭髮，我見佢啲化妝品都有Anna Sui同Shu Uemura，不過粉底唔知咩牌子，底妝我覺得貼過FB，同埋眼紋都少咗，唔知係咪佢啲安瓶真係勁啲！佢話出面冇得賣架！

但係化眼妝有啲驚，因為好多blog友話小雯化到對眼好腫，所以我叫佢化濃啲對眼都ok，但佢話婚紗造型會化淡啲，之後晚裝先加深，佢幫我痴咗兩對假眼睫毛同埋畫咗勁粗眼線，所以我帶去對濃密誇張款假眼睫毛都冇用到，但係佢痴假眼睫毛痴得唔夠翹，同埋我發覺佢搽eye shadow只搽眼尾位，眼頭完全冇搽，我諗化到眼腫應該係呢個原因，我本身雙眼皮已經唔係好深，但係佢話影相ok嘅，咁我又即管信佢，後尾就發覺“賴嘢”！！

之前有blog友話要帶乳貼去，因為全部衫都有墊，唔須要用girdle，咁我諗住有nu bra就唔洗乳貼啦，點知小雯話nu bra都唔洗用！ｏｈ．．．咁我就同小雯坦誠相見咗5次喇！！其實大家女仔都唔係好尷尬啫，佢都見慣啦！不過嚟緊去台灣影相嘅朋友就最好買定乳貼啦！！　小雯會諗定邊件衫襯咩造型﹑邊個造型襯邊個景，我冇比過意見，不過覺得襯得幾好！

好似變咗單眼皮咁！但係佢親手造嘅小禮帽幾靚！



放一邊頭髮，好似FB個造型！不過好似Bonny整得靚啲！

呢個就係小雯喇，牛牛都要set頭架！



侍應款西裝褸加自備背心豬腸呔



原本係100%侍應look！！所以冇要原裝bow tie同腰封！



開咗閃光燈，牛牛件西裝褸反晒光，好樣衰！



因為冇落雨，所以第一站就去陽明山，影硫磺湖﹑火山噴氣口﹑瀑布﹑竹林。其實佢哋比你自己帶相機影架，不過因為冇地方擺，袋落褲袋又會突起唔好睇，所以我哋淨係轉造型嘅時候影咋！！

第二站去海芋園，有海芋﹑薰衣草﹑楓樹同小黃花。要比入場費 nt$100@，我哋5個人total nt$500，我覺得幾抵，因為nt$500可以ordar同等價值嘅食物，又有室內可以坐定定轉妝，仲有“救命暖爐”添！如果唔係我可能已經凍到唔識郁喇！

第二個造型勁台灣feel，我唔係好中意，不過咩都試吓啦，最多揀少啲相！小雯幫我加咗粉紅色eye shadow，比之前好少少，雙眼皮出番少少！***見唔見到後面啲叔叔嬸嬸著幾多衫！我就得條毛～～

呢個海芋園應該喺好北面，一路開車上去越來越大雨，一落車已經勁凍，同車上嘅暖氣起碼相差15度！加上淋濕咗又凍多幾度，我真係有啲佩服自己咁勇敢，哈哈！ 影完相竟然有熱辣辣雞湯同12款饅頭，太好喇！！因為比咗入場費囉！

因為環境咁“舒適”，所以我哋轉埋第三個造型先離開，但係 toilet 好濕，好彩佢哋有準備帳蓬比我換衫！好似要租佢哋嘅車先有，如果自己租車去就平啲，不過好似冇咁方便囉！



仲有助手小Ｊ做看更添！



第三套係紫色晚裝，小雯想幫我加淺紫色eye shadow，我 request用深紫色，因為實在唔放心個個 look都眼腫腫未瞓醒咁，補完裝之後即刻“叮”一聲，精靈眼仔番晒嚟！！始終深紫色至係我最愛！攪掂第三個造型又出發喇！

請看下篇．．．．．．