非常台北 BMW 影相日花絮二＋揀相

第三站係翡翠灣海水浴場﹑太平洋渡假飯店﹑沙灘

呢度都係要比入場費，好似係 nt$700

條裙我好中意架，好襯呢度個景！

大花花頭飾加辮仔頭

係我要求辮仔頭架，小雯都整得幾靚，不過影相好似唔係好覺！

影完風車﹑沙灘之後換埋造型先影白色牌坊，呢個髮型都係我要求嘅，同我比佢睇嘅相有9成似，都好襯件婚紗吖！最估唔到嘅係小雯喺另一個花球度剪啲鮮花比我，我以為係會用假花頭飾，小雯實在太好喇！

因為條裙太鬆，小雯即場幫我改size，又係估佢唔到，針線都帶埋出嚟，勁！

牛牛無聊幫我影低小雯為我造嘅小禮帽頭飾，不過我覺得實物靚過影相，有啲可惜！

牛牛都換咗衫，入面仍然係自備嗰套背心！

第四站野柳地質公園﹑青苔石灘，勁大風勁凍，吹到人都企唔穩咁濟，一影完即刻衝上車打道回府！！

第五站影樓

呢個頭我超愛，小雯真係識“變髮術”，一個造型靚過一個，不過化妝就一般啦！都係Bonny好啲！

小雯話室內可以用誇張啲飾物，又試吓囉，條頸鏈真係好誇！

呢個頭又係有辮仔架，喺兩條閃閃頭cool 中間，不過好似唔係好覺！

室內佈景得兩個，一個係全白咩都冇，一個係灰色花加紅色梳化，影完就收工囉

換埋衫就過番去BMW，傳說中好好味嘅豬扒飯已經等緊我哋喇，不過我覺得一般啫！一路食嘅時候，小Ｊ開咗幾張相比我哋睇，我同牛牛講：「今次又“賴嘢”喇！快啲諗吓budget幾多！！」

我哋影咗260張，揀相過程同網上流傳一樣，嘉嘉要我哋決定要幾多本相簿先比我哋睇相，我梗係話唔加相啦因為太貴，叫佢開始比我哋cut相，佢就解釋好多相係董主任影嘅時候已經設計好，擺咩post﹑影咩角度．．．係有情節 for相簿做設計嘅！我梗係知啦，不過佢哋 suggest最少加30張，即係total 70張做相簿先靚，要加 HK$9000呀！！我話香港影咗 ard $170@已經入埋相簿，仲有水晶面，大陸仲平．．．講咗一陣佢哋就比我哋睇相喇，我都冇話要幾多張架！不過佢哋用mac機，唔比我哋自己控制，小Ｊ幾張幾張開出嚟，又唔可以放到好大，好麻煩！

開頭我哋諗住盡量每個景cut 淨一兩張，不過原來係冇可能嘅！因為董主任真係太勁喇！！明明好大霧影到變咗好有feel﹑落雨影出嚟都好sharp好似好好天氣﹑個天灰晒可以影到變白天．．．最過份係260張相，竟然冇一張影到我方方面！！重點係影嘅過程我唔須要拗頸拗腰去遷就角度，只係好自然咁擺 post，董主任亦都唔洗試閃光燈，通常要再影都係因為太大風，所以影完成日外景一啲都唔累！之前已經知道董主任好出名，果然名不虛傳，我唔洗特別指定都可以比董主任影實在太幸運喇！睇相嘅時候，董主任﹑小雯﹑小Ｊ﹑嘉嘉都一齊睇，有幾張相一開出嚟大家一齊大笑，佢哋話牛牛留鬍鬚表面係藝術家型，但實際係攪笑型！牛牛扮可愛仲多表情過我！

cut完第一round 仲有133張，impossible！！我個package只係包40張，佢哋比我揀埋40張MV唔同款，太好喇！不過就冇soft copy，咁都仲要cut 53張！我估計我只可以cut多20張左右，因為第一個妝真係唔係好得，第二個髮型又唔係太中意，同埋凍到表情都梗晒，但係我又中意啲景喎．．．最主要係最後三個造型都好中意同埋影得靚！經過一輪講價﹑扮窮﹑苦苦哀求後，呢133個影像都係屬於我喇！將會有70張入相簿連soft copy，23個淨soft copy包執相，40個整MV冇soft copy，當然有啲買有啲係送架啦！因為只係cut咗一次相，仲有啲可以再cut嘅，咁我問嘉嘉如果我要少啲禮物係咪可以平啲，哈哈！比佢識穿咗，禮物點可以換錢哩！講價嘅過程都好開心架，有講有笑，唔係網上啲人話佢哋會黑面﹑講啲難聽嘅說話﹑有個自稱老闆態度好差嘅人走出嚟．．．．．．冇喎！我同牛牛覺得佢哋好似趕收工咁，所以好“順攤”，唔知係咪要同小雯慶祝生日呢！

之後傾埋少少細節，執相有三個 level，我哋揀咗執最少嗰種，好似自然啲！美編都有A﹑B﹑C三種，我哋揀C，即係A＋B，兩樣都有囉，好似多啲變化！再揀埋油畫同兩個相架用咩相，油畫框幾靚，多數係白色雕花，相框就得一個款，個人認為唔靚不過冇辦法！我哋唔要提名冊，嘉嘉比我哋加大油畫到30"，不過我覺得我哋要唔要提名冊應該都可以加大！但係佢又唔肯送多個相架，我見其他JM都有4個，不過佢哋加得多錢過我，算！

最後要小Ｊ車牛牛番酒店攞銀包！

成交價都係預計之內，不過得到嘅嘢多咗，所以都好滿意！而家反而有啲後悔FB加咗咁多錢添！！