我又出血返嚟喇！台灣婚紗相之旅～Day 1

之前話“目標係一蚊都唔加”梗係冇可能啦！等我慢慢講吓我嘅出血過程啦！

第一日去到台灣就落雨，仲要帶唔夠衫勁凍！可憐嘅我要用件長袖衫當頸巾，咁都比我諗到，勁！一落機就去揀衫，其實我哋join嘅係非常台北嘅精品館 - 漂亮結婚女人世紀婚禮(B.M.W) ，去到附近搵咗好耐都搵唔到，要入去非常台北問啲STAFF，原來係對面街同埋細間好多！

非台總店係一棟，BMW只係一個鋪位，不過入面都係三層！

新娘秘書嘉嘉已經等緊我哋，傾咗幾句就叫華姐幫我揀衫，網上好多人都有提過華姐，佢好好人幾攪笑，不過比我激死！因為我話想要young啲﹑活潑啲嘅款，但係我上網見人著過嘅款都唔想揀，試咗好多都唔啱，其實佢哋啲衫真係好唔掂，加上影完FB之後有比較！之後我比我save喺電話嘅相佢睇，多數都係有lace嘅款同埋一啲輕巧款，華姐話有lace即係高貴成熟喎，都唔知我想點！！之後佢話攝影師董主任特別為我準備咗兩件婚紗同兩件紫色晚裝，係新款冇人著過，因為董主任話我係VIP，同埋我join package時話過要活潑feel同埋紫色晚裝，不過都係失望！！可能台灣同香港嘅taste同style真係好唔同！最後試咗廿幾件，好辛苦先揀到5件！本身package包一件和服or中式衫，不過我唔like，所以比我轉埋晚裝！

之後同mua傾造型，出發前收到新娘秘書嘉嘉email，佢話mua會轉咗係Candy，我問點解唔係小雯（因為小雯係出名嘅），但係佢冇再覆我，咁我就以為mua會係Candy，點知原來小雯唔放假都返嚟幫我化妝，原來我影相嗰日係佢生日！佢仲特別為我造咗個小禮帽頭飾，上面釘咗珠珠同加咗羽毛，因為我join package時有問過有冇小禮帽同羽毛頭飾，佢真係好好呀！我又問佢個紅玫瑰花球（係送嘅）可唔可以轉海芋花，因為香港無！佢話可以比我揀其他顏色玫瑰，咁我就梗係要紫色啦！Good ！佢話傾完晒所有安排之後就過去總店揀男禮，佢叫我哋揀最普通款就可以，因為外景唔須要好華麗，唔好嘥錢upgrade，真係知我心意！其實我開頭真係諗住唔帶佢出去，點知佢咁細心咁好人，我又驚到時落雨攪到披頭散髮唔知點算，所以最後都係帶佢出去，不過真係好貴！！我再比埋啲相佢睇，大概講埋其他造型就開始傾行程喇！

大家應該記得我之前已經諗定晒路線，點知董主任話一定會落雨，如果細雨都免強可以去陽明山，但大雨就要改去淡水，即係影唔到瀑布 / 野柳！我都唔想去淡水影農場花海，太陽花﹑小黃花嗰啲唔係我杯茶，漁人碼頭又冇咩特別！我想去奧萬大影紅色楓葉，董主任又話而家嘅楓樹係綠色，唔好去奧萬大！想影薰衣草同櫻花又話櫻花已經謝晒，oh．．．勁失望！咁我就淨係要求影浪漫活潑feel，唔要扮cool囉！其他嘅你哋話事啦！全部攪掂晒用咗三個鐘。

想知最後影咗咩景？想知揀咗咩衫？留意下下下篇啦．．．