Love House 籌備七 ～ 深圳尋寶 take three

今日又北上行街街，大陸冇 Easter Holiday真好！來回車費都係$55玩足一日，好過喺香港行街亂洗錢！！今次上去有三個mission，一係睇浴室櫃，二係買廚房燈，三係尋找「超凡家居」。

一上去就去咗田貝四路五方家居「嘉怡廚櫃」先，因為好大機會喺佢度造廚櫃（上次已經報咗價），所以諗住比佢造埋浴室櫃，可以慳番度尺費，又穩陣啲！浴室櫃同廚櫃一樣$1480一尺，鏡櫃加多一兩百，都ok吖！不過我再問強化玻璃有冇sample睇（因為上次傾咗廚櫃中間用強化玻璃，佢話遲啲有sample比我揀colour），佢今次竟然唔recommend我用強化玻璃，話爐頭咁熱驚塊玻璃會爆！（係另一個sales講嘅！）吓？？？強化玻璃都會爆？？？激死！即係唔係強化玻璃啦！所以而家諗住open kitchen都係鋪埋瓦仔好似穩陣啲，不過又貴咗！！之後又睇埋廚房瓦仔，好快睇中咗一款灰色暗花（襯番地磚灰白色玫瑰暗花）30cm X 45cm都係 $8一塊，好抵！不過「家之福」都應該有呢個款，所以唔會喺度買！

第二站再去「家合居」，由「五方家居」行過去十分鐘左右，不過上次行完今次再去都冇咩收穫！本來想睇吓Delong嘅“雨淋花灑”咩價錢，點知行晒成個場都搵唔到！奇怪！！朋友仔就訂咗盞燈，標價5千幾，最後講到 $1880，佢睇中咗好耐，不過我覺得大陸買嘢呢啲價錢好恐怖！！

第三站「又一居燈飾城」，我心愛嘅open kitchen通花三頭吊燈，再見番“佢”都係咁中意！不過今次有個女人（應該係老板娘）話折咗$780，上次個sales話$680咋！太過份！！最後講咗好耐價都係 $600，老板娘話佢哋係正式代理，低過 $600唔賣！咁我都見佢鋪頭係打正“VISDANFO威斯丹弗”，又貼晒証書喺牆上面，應該都唔會係老翻啩！重點喺得佢一間有呢個款！！淘寶唔知真定假都賣五百幾蚊，仲未計運費，所以下星期我就會帶佢走喇．．．點解下星期？因為隔離鋪竟然有我喺淘寶睇中嘅田園房燈and壁燈（search咗好耐又係只有一個seller有得賣！）佢仲平過淘寶價，其實係因為老細報錯價所以平咗，哈哈！ 最後佢跟報錯嘅價賣比我，再平多廿蚊，好抵呀！！因為盞壁燈要訂，所以下星期再上去一次過帶晒三盞燈番屋企！！

田園 feel 三頭房燈＋壁燈＝ $360， 淘寶都要$510（加咗價！！未計運費），勁抵！！實物比起上網睇相仲大仲靚呀！！

呢盞就係我心愛嘅open kitchen通花三頭吊燈，手工好好架（終於影到實物）！$600

本來想買埋呢盞做電腦房燈，又係我愛嘅通花，不過都要 $600，太貴喇！放棄～～

第四站「超凡家居」，之前去咗兩次都搵唔到，今次終於都搵喇！好彩遇到個醒目“食Q”，「超凡家居」改咗名做「藝荗工藝品中心」，真係好多嘢睇呀，之前見人話買田園梳化墊﹑花花碗碟套裝﹑田園擺設．．．好似尋寶咁！不過冇冷氣，牛牛行到黑晒面，哈哈．．．我梗係唔理佢繼續行啦！！可惜啱啱裝修，只係開咗一樓二樓，三至六樓都裝修緊！最大收穫係見到我想買嘅雀籠，買嚟做咩？？我諗住結咗婚之後放個花球入去掛喺燈糟做裝飾！！之前淘寶搵過未計運費都成舊水，而家未講價 $120，仲可以即刻帶番屋企，可能下星期帶埋佢走囉～～

仲有睇咗好多間鋪賣梳化墊，雖然未confirm買布藝梳化定皮梳化，不過我覺得牛牛like芝華仕多啲，如果真係買芝華仕，我一定要米色，啡色真係好老土，但係米色又唔襟污漕，所以睇定梳化墊防污，點知多數都係粉紅色碎花，唔係我杯茶．．．有一間有紫色碎花，不過都係粉紅色底，都係一般，唉．．．牛牛話遲啲去東門睇窗簾順便睇吓有冇布啱做梳化墊，都時先算啦！

今日只係行咗6個鐘，下星期繼續深圳尋寶 take four．．．．．．