裝修 Day 6～北上訂磚﹑廚櫃，尋燈﹑廁紙架

今日收到個壞消息，cf 話負責水喉電線嘅cf 要下星期三先得閒開工，即係呢兩日冇嘢攪！唉．．．．．．

訂磚

本來上個月已經喺寶安北路家之福揀咗好多款磚，但係今日要去埋訂廚櫃，所以改變策略，冇去寶安北路，改咗去田貝四路，咁就唔洗咁趕！我哋1點鐘去到玩到8點先走，好充實！喺「家合居」訂晒全屋磚，分兩間鋪買，total rmb$5740，運費$250一噸送到樓下，要送上樓就到時加錢比工人，如果計埋運費匯率應該within HK$8000，冇over budget，叻！

玫瑰暗花半拋光地磚有4隻色，2呎*2呎，$32，講價 $30！我揀咗淺灰白for廳房地台，深灰for廁所地台。腳線都係用同一款，一開七，切割費$1條，我掛住揀磚影相唔記得講價，牛牛又咩都唔知，應該$0.8都ok架，蝕咗$14！



浴室牆身白色凹凸波波磚，1呎*2呎 $13，講價 $12



本來浴室牆身想揀呢款，花花圖案係突起一粒粒好得意，不過驚會娘娘地，同埋唔襯馬塞克企缸，所以最後放棄咗！



廚房牆身磚，好似蛇皮紋，1呎*1呎 $5.5，講價 $5



Total $4902，再講價 $4880，比咗$1000訂。

合盛建材～田貝四路家合居A1025號

馬塞克
之後去睇馬塞克，原來深紫色馬塞克真係好難搵！喺家合居睇唔啱，過去五方又唔啱，再返家合居再搵，好彩最後發現有一間有我想要嘅色，係好深嘅紫色，可以自己拼顏色，我揀咗拼深淺灰，深紫色要50%，深淺灰各25%，好pro呀！不過好貴，1呎*1呎 $48，即係話我淨係鋪個企缸牆身要二千幾蚊！！加埋砌企缸嘅水泥錢同埋浴屏，total 咪成萬蚊！買個按摩浴缸都得啦！！所以最後放棄咗鋪全個馬塞克企缸，改為只鋪兩行馬塞克，只須 $670，比咗$200訂！叫做了咗我心願啦，不過都有啲失望．．．．．． 行咗幾個鐘搵得咁辛苦又咁貴，希望出嚟效果滿意啦！因為自己拼顏色，冇色版睇，其實都係博一博咋！

正常應該三兩日就有貨，不過因為隻馬塞克要訂，一個星期先有，所以兩間鋪全部磚會等埋一齊送，可以慳番啲運費（因為按噸計），約咗下星期日收貨。

本來仲買埋掃口粉，即係填縫劑，2盒灰色﹑4盒白色，$18@，有成10隻色揀，可以跟埋磚一齊送貨，點知返到香港打比cf，佢話佢有準備比我！等我仲懶醒！聽日要打上去問下可唔可以取消唔要！

廚櫃
跟住去五方家居「嘉怡廚櫃」落單confirm我期待已久嘅田園廚櫃，講價平咗$200咁大把！套廚櫃 rmb$5212，計埋度尺﹑運費﹑安裝﹑匯率大約 HK$9300，比咗$500訂，等鋪完磚先打比佢哋嘅香港師父約上門度呎，度完呎之後我哋要上多去一次傾細節，因為所有嘢都可以自己揀，門板顏色﹑田園花紋﹑手抽﹑天花頂線．．．同埋會計埋實價，應該6月左右啦！可能會比佢造埋廁所洗手盤櫃同鞋櫃，一樣係田園款，2呎洗手盤櫃連鏡櫃 rmb$710，４呎*8呎鞋櫃上半部做玻璃飾櫃 rmb$3000，到時度呎先決定做唔做埋！

燈

話說我哋未收樓之前已經急不及待買咗3盞田園燈，而家仲爭客廳同細房。其實客廳牛牛一早睇中呢盞田園Led紫水晶燈，不過我哋個迷你客廳似乎太迫，所以再去睇其他款，點知行來行去牛牛都係對呢盞情有獨鍾（真係專一．．．嘩哈哈！），最後決定等cf 裝咗燈槽先決定！

細房一直冇idea，只係想揀款冇咁女仔但係又要少少田園，好深呀！之前淘寶見到呢款通花波波燈 $98，好抵！雖然唔係叮一聲好靚嗰種，但都可以考慮，家合居見到一盞9成似，標價 $680，我冇問實價，諗住再揀唔到就淘寶攪掂！！

廁紙架

我仲想搵一款座地廁紙架，因為廁所好迫，座地廁紙架擺邊都得唔怕撞親手（係抄朋友仔嘅）！不過行晒五方同家合居都冇，問啲sales哥哥佢直情唔知我講乜！香港見過上海街賣五百幾蚊，太誇張喇，平時一個普通廁紙架只係幾十蚊！

淘寶搵到呢款 $98，不過冇我想要嗰款咁靚！有冇人知道邊度有類似物體但係平啲呢？