Love House 籌備九 ～ 收樓＋confirm裝修cf

上星期4月30日已經收咗樓喇，足足等咗三個半月，之前一路都好期待收樓一刻，有屬於我同牛牛嘅“迷你Love House”，不過到真正收樓之後，竟然一啲興奮嘅感覺都冇，一直都冇心情 / 時間寫blog，因為我個銀行戶口即將比人洗劫一空！！

呢個星期不停plan裝修嘅嘢，最後都係決定唔搵屋苑嘅裝修公司，confirm咗牛牛屋企用過嘅cf，好似幾老實同埋手工唔錯，重點係比較平！點知同cf 越傾越發覺好多嘢要整 / 要換 / 要買！ 因為我哋嘅“迷你Love House”已經廿五歲喇，為咗令“佢”身體健康長命百歲，所以咩都要拆晒換晒，免除後顧之憂，費事到時住落再整仲煩！

雖然cf 報價唔貴，但係要整嘅 item越來越多，計埋傢俬電器又over-budget！本來我仲諗住番深圳影多輯平平哋pre-wedding，rmb$3699有200張相，真係好抵呀！見人哋影“婚紗城”好靚！我又未影過歐陸式建築物﹑又未影過夜景﹑又冇著過黑色同紅色晚裝．．．．．．點知扭咗幾日計牛牛都唔比，佢話攪掂間屋下年先影喎！！下年都結咗婚啦，佢仲點會有心機陪我影！！！ 不過裝修洗咁多錢，我都係乖乖哋聽牛牛話啦，但係自己唔開心咗成個星期囉～～

比大家睇吓我哋間迷你屋啦~~

鐵閘超舊～out！



木門內外唔同色勁樣衰～out！



原本間格係呂字型，好快就唔係喇～～



客廳～個窗間格好古怪～out！



飯廳將會變身為open kitchen～老爺冷氣機～out！



右手面嘅廚房拆咗就唔會有咁大條走廊



主人房～只可以擺一張雙人床同一個四呎衣櫃，所以拆咗個廚房會分一半比主人房，咁就可以訂造7呎大衣櫃喇！



阿B房第時放單人床應該夠用！



廁所都幾新淨，不過我對佢冇feel，同埋洗衣機要住埋喺度，所以～out！將會成個廁所拆晒重新整過，要縮細企缸同洗手盤櫃～



廚房將會消失得無影無踪！



最衰就係成屋橫樑，客廳﹑飯廳﹑房﹑廚房﹑廁所全部都有！討厭！！又要整燈槽～



仲有會將所有牆身地板拆晒再整，因為要換晒全屋水喉電線，又係錢錢錢錢～～