煩惱一
之前一心諗住去裕興發訂造床﹑衣櫃﹑鞋櫃﹑梳妝枱，點知cf 話佢都造到田園傢俬，佢係幫我搵傢俬鋪訂造，仲係用夾板添！報價又唔算貴，$1100/呎，平過屋苑嘅裝修公司好多（$1400/呎，一樣係夾板)！但係我問過香港幾間傢俬鋪都係用高纖板，包括裕興發，高纖板冇咁襟用但係平啲，$850-$880/呎，即係話淨係油壓床﹑7呎衣櫃﹑鞋櫃三件夾埋都平$4300！但係牛牛爸爸就話cf 造啲傢俬好實淨好滿意（係普通款！），不過cf 冇實物圖比我睇，係我比相佢跟住造，都唔知造出嚟似唔似！所以而家都唔知點算好！
煩惱二
本來決定咗去深圳嘉怡造廚櫃，但原來cf 造都只係比嘉怡貴$3000左右，一樣用料！不過cf 好似穩陣啲，有信心保證！但嘉怡就可以順便造埋鞋櫃＋飾物櫃，咁可能又慳多二千蚊！點算好呢？
煩惱三
早幾日上新屋，發覺兩間房同客廳遍地屍骸．．．．．．應該係蚊！原來之前上去牛牛唔記得關廚房窗，啲蚊蚊飛晒入屋死晒！！希望係早排落雨先會咁多蚊，如果平時都係咁嘅話，可能未入伙我就已經比蚊蚊咬死咗！！即係話而家全屋都要裝蚊網，咁用磁石款好定回捲式好呢？磁石款可以拆出嚟洗﹑又平但係唔耐用．．．其實我覺得蚊網好樣衰，又會令到間屋暗啲！如果用蚊燈，係咪要隻蚊飛埋去先會死呢？咁電蚊香又係咪唔可以長插呢？又多樣嘢煩！又係錢！！
煩惱四
前業主留咗熱水爐比我哋，開頭諗住慳得就慳用住先，點知石油氣公司話個石油氣錶唔可以移位，原本喺廚櫃入面，但係我哋會拆咗個廚房一半做主人房一半做廳，咁即係個石油氣錶會喺我衣櫃入面？？？唔係呀化！！Impossible！！咁唯有拆埋個石油氣錶改用電熱水爐，即係個熱水爐都要換埋！雖然過咗兩年沖涼等水滾嘅日子我都習慣咗，但問題係而家個迷你企缸無可能放到儲水式電熱水爐！我哋屋苑又用唔到即熱三相電熱水爐，咁單相係咪都可以for埋廚房呢，電費又會唔會好貴呢？
牛牛企上廚櫃做咩？咪幫我睇吓個石油氣錶位置囉！
紅圈就係拆咗石油氣錶淨番少少喉，咁都唔係好礙眼啫！
煩惱五
因為拆咗廚房一定要換過鋁窗，如果唔係就會有兩個抽氣扇喺客廳！所以又諗住慳得就慳淨係換廚房同客廳鋁窗，點知cf 又話我哋屋苑試過跌鋁窗落街，啲窗都好舊同埋唔穩陣，都係全屋換晒好啲，ｏｈ．．．．．．又係錢！其實過一兩年先換會唔會好麻煩呢？
睇埋你上篇全屋最舊真係個廚房wor! 呢part 一定唔慳得!
回覆刪除之但係你全屋傢私比人造係貴dd 架! 唔好忘記裝修傢私一筆, 電器都要一筆架! 要有一個love house 真係好金下架!! 有冇諗過買現成的呢? 平好多架!
慢慢搞啦! add oil!!
[版主回覆05/06/2010 23:40:00]因為間屋多橫樑,現成嘅款唔啱呀!!唉...真係好貴!不過諗住呢間迷你屋起碼住十年架喇!!所以想整好啲囉!
嘩~睇來你真係要洗一大筆,但要整既我建議你都係一次過整晒好D了!事關第二時你地有個B之前,你就更加唔會整到架喇~ 加油呀!
回覆刪除[版主回覆05/07/2010 13:25:00]我都係咁諗呀!!不過真係好貴!!唉......聽日再同你詳談啦~~
我認為一次過整好過住落先整 。你幻想下裝修完，就有一個完成屬於你兩的家，就唔會咁煩啦！比心機呀！
回覆刪除[版主回覆05/07/2010 13:27:00]多謝你! 希望裝修完真係似我心目中嘅dream house啦!
睇埋你呢個post, 我都好驚我同師傅傾完之後會大出血呀~
回覆刪除我哋今個星期日會上佢鋪頭傾~
哈哈~ 我又發現多一樣嘢同你一樣，就係我哋間屋同你間love house一樣都係25歲喇~ XDDD
小車車
[版主回覆05/07/2010 13:44:00]又係25歲??......咁裝修一定唔平得去邊喇!!
唔知呀而家~ 星期日聽咗報價先算啦~ ^^
回覆刪除[版主回覆05/07/2010 15:54:00]問多幾間啦,原來裝修價錢可以差好遠!!
要為家居做裝修是最令人頭痛的,又要兼顧質量問题,所以我短期內也不會考慮裝修~~
回覆刪除[版主回覆05/08/2010 00:02:00]買舊樓,樓價平,裝修貴......都係錢!!
路過.....電蚊液可長開8小時, 唔係郊區 夠殺啦
回覆刪除[版主回覆05/09/2010 16:21:00]電蚊液我都用過,但係8個鐘唔夠呀!!
換窗真係一次過好....拆窗時窗邊d 牆/ 窗台石會爛, 到時又要執啦~
回覆刪除[版主回覆05/09/2010 16:23:00]我都有聽人講過,所以應該都會一次過換晒喇,多謝你意見呀!!
我覺得呢.......CU 係好主觀, 如果有人用過佢 ok 就唯有信佢.
回覆刪除至於裕興發個度, 我上次問佢, 佢話用夾板. 我係問許生嫁. 同埋如果 高纖板都無所謂既, 最緊要你去睇下佢現成既成品實唔實淨. 好似我買衣櫃都睇左好多間先搵到一間好實淨.
[版主回覆05/09/2010 16:32:00]我諗住7呎衣櫃就用夾板好似穩陣啲,其他鞋櫃,書枱,床都可以用高纖板...不過又考慮緊番深圳造廚櫃好唔好造埋鞋櫃書枱,都唔知點好!!
係喎...點解好似唔見你造廚櫃??
菲比, 唔好意思, 我記錯左呀 !! 上次許生有解釋比我聽, 佢好似夾板同 高纖板都有. 不過我係用左高纖板. 我見都幾實淨......你可以問多幾間舖, 兩種板係咪好大分別.
回覆刪除[版主回覆05/09/2010 16:33:00]我等緊你收貨呀!!如果造得好我就抄你嘛!!哈哈!!
um... 橫樑多... 你樓底夠唔夠高?? 可以考慮下整假天花... 好似靚d wor~ 至於傢俬... 盡可能都係夾板好d~ 始終實淨d... 夠硬身唔駛加到d板好厚!! 同埋香港潮濕... 夾板防潮好d~ 蚊... 太陽落山前最入屋... o個段時間盡量唔好開窗! 電蚊機... 直係好有效! (唔係支裝... ) 好似唔止8個鐘bor...長用都得~~
回覆刪除新居真係好多野要煩~~ 加油!!! ^^
[版主回覆05/11/2010 09:52:00]樓底得8呎咋,客廳應該會整S形燈槽囉,房就唔攪喇! 大衣櫃就一定會用夾板,其他鞋櫃,床......仲諗緊!!都係budget問題!! 電蚊機真係必買呀,要去睇睇先!!
你間屋都可以煩少好多啦,一齊加油啦~~
好呀, 你等下我, 收貨 share d 相比你參考. 我個厨櫃剛做好, 依排勁忙, 今日會 update 個 blog 啦 !!
回覆刪除[版主回覆05/11/2010 21:57:00]好呀...我個廚櫃仲諗緊番唔番大陸造呀!
咁多野煩, 我都好驚... 我8 月先收樓,到時又要顧結婚D 野....
回覆刪除[版主回覆05/11/2010 21:56:00]同步進行真係好忙架!所以我哋早啲影晒結婚相就可以專心攪裝修,入伙之後先攪番註冊食飯啲嘢囉!
你好呀,唔覺意入左黎睇你個blog
回覆刪除比小小提議你
之前睇電視有講過 如果你裝左蛟網 怕間屋望出外面時會蒙查查
可以用一支黑色箱頭筆 油下個網 就清哂架喇 就唔怕望出外面唔舒服啦
[版主回覆07/01/2010 23:03:00]黑色箱頭筆?? 咁咪仲黑??
我仲未決定買唔買蚊網呀,如果電蚊機ok就洗買啦!
以前D抽氣扇個扇葉係藍色, 好靚架
回覆刪除對唔住,請問你係未自己拆否石油氣錶,定搵番供應商拆呢?
回覆刪除我新搬入嘅公屋單位,上手欠交費用,我去佢地門市表明身份...佢地要求我比佢入屋拆錶(我 "一啖" 都無用過佢地)..請幫忙解答呀! 謝謝
我怕比佢地屈..但個死人錶又牙地....
[版主回覆06/02/2011 14:16:00]係石油氣公司拆的,我搬入之前已拆