聖誕換新衫！！

又到聖誕又到聖誕～～～

好多blog友仔都幫自己個blog換咗新衫喇，我都襯吓熱鬧先！RoseBlog有勁多教學，我呢個電腦白痴都整到，大家一定得！一齊玩吓啦！不過有冇人可以話比我知，點解右邊最新網誌﹑相簿﹑留言板﹑我的blog友呢幾個字係白色？點可以變返黑色呢？？

除咗blog之外，今年係牛太第一次同牛生喺迷你田園屋過聖誕，梗係要佈置吓啦！帶大家參觀吓聖誕版田園屋．．．．．．

門口屏風～紫色＋幻彩蝴蝶

C字櫃～呢幾個紫色水滴純粹因為唔洗錢唔好嘥就掛埋出嚟

掛鐘～鹿仔聖誕 bell

房門口～最肉酸係呢幾條，因為我揀咗好多紫色裝飾唔夠聖誕 feel，所以求其買多幾條紅紅綠綠嘅

TV wall～又係紫色＋聖誕波波

粉紅色嗰兩個係Melody嚟架，紅色係雪人

結婚Monchhichi＋小可愛

燈燈燈燈．．．．．．我恨咗好多年嘅聖誕燈呀！！第一晚“亮燈儀式”嘅時候，有個小朋友喺樓下大叫“好靚呀！” 如果牛牛早過我返屋企，佢就會開定聖誕燈，然後落巴士站接我，喺樓下望上去好靚架！！

仲有仲有．．．我哋今年嘅聖誕主題係“落雪田園”，我貼咗大大小小嘅雪花喺幅線簾上，紫＋白，Good！

仲有呢個聖誕老人同聖誕樹係咪好鬼得意呢！係膠嚟架，貼係玻璃窗，朝早望住佢哋食早餐好開心！夜晚出面黑麻麻就睇佢哋唔到架喇，不過唔緊要啦，夜晚可以“點燈”吖嘛！

最可惜係間屋太迷你喇，放唔到真正嘅聖誕樹啦！

淘寶～蝴蝶梳化墊﹑廁紙筒﹑開關貼﹑椅腳套﹑花花坐墊

好耐都冇update個blog喇，因為結完婚﹑去完honeymoon之後好似冇咩好寫．．．但係我都有keep住睇各位blog友仔嘅post架！

呢排又沉淪喺淘寶毒海之中．．．上個月一次過淘咗7個 iphone case，日日都可以幫部電話換新衫！今個月又回歸到花花田園家居，真係不得不同大家分享吓，好靚架（我覺得）！

原本新居入伙前已經喺深圳買咗塊梳化墊，但係size長咗少少，同埋靠背位遮唔到，所以今次喺淘寶買多一塊，其實仲貴過深圳，不過之前去深圳都冇見過呢個款，同埋我短期內都唔會再去啦，唯有喺淘寶買貴嘢囉！雖然貴，但係買得開心，因為呢塊蝴蝶梳化墊好襯我盞蝴蝶燈呀！ 90x150cm，rmb $75

棉質粉紅波點廁紙筒～擺喺房用好可愛吖！rmb $11

粉紅波點開關貼～因為之前換門鐘要鑿牆，攪到附近範圍啲油唔同色，好肉酸呀！而家用呢個開關貼遮住啱啱好，朋友仔嚟探我一定唔會搵錯門口啦！ rmb $6.5

粉紅波點椅腳套～呢個椅腳套最好就係橡筋頭，之前買過綁繩款成日甩，不過細咗啲，我張梳妝椅腳太粗，唯有比圓櫈用啦！rmb $1.5 x 4 = $6

花花田園坐墊～超級舒服，夠厚，有綁繩！雖然同我張cheap cheap電腦椅好唔襯．．．其實我已經密謀緊換埋張電腦枱and電腦椅！ rmb $26

其實我唔係特登買咁多粉紅波點嘢架！不過佢冇其他colour，我又唔想揀 lace款喎．．．都幾靚吖！
以上全部喺同一間shop買，買滿$100減$5（好過冇啦！），運費 rmb $30（首重$20/kg，續重$10/kg）

http://shop57564827.taobao.com/



另外喺第二間買多個廁紙筒客廳用，又Lace又珍珠，好grand 呀！不過少少貴啦！rmb $23

田園碎花坐墊～呢個冇咩特別，反正都要比運費，買定嚟替換囉！rmb $19

因為買得少嘢同埋唔重，所以寄去朋友大陸公司，可以慳番啲運費！rmb $12 講價 rmb $8，勁！咁都有價講，慳得一蚊得一蚊！ （其實寄國內多數都係rmb $8/kg）

http://jun-love.taobao.com/



同場加映“老翻Anna Sui”系列，香港好多地方都有得賣，但係淘寶價當然實惠好多啦！

坐枱化妝鏡，我同家姐一人一塊！原本我都有塊一模一樣用咗幾年架喇，不過早排唔小心打爛指甲油整到污糟晒！ rmb $9.9@

化妝棉盒～仲有白色／透明可供選擇 rmb $9.9

平梳～原本我都有一把喺旺角買$10，不過爛咗！ rmb $1.9

摺梳～家姐搭單買 rmb $2.8

運費 rmb $25，仲送咗個仿珍珠頭cool，我送咗比同事，佢不知幾中意！

http://shop34654981.taobao.com/?search=y&scid=55824003&scname=ofOwssTIy9XEp7eouaS%2B36Hz&checkedRange=true&queryType=cat