牛牛生日食食食之旅

第一年同老公過生日，冇得去旅行，只係喺香港周圍食好嘢，星期五放工就約埋班朋友仔一行十人去試間新開嘅日式放題，真係唔怕幅射唔怕屎，哈哈！間放題喺佐敦叫「津野」，$180一位免加一，都ok啦！

我最中意食刺身﹑羊架﹑炸蠔

食飽飽就返屋企切蛋糕，終於都試咗傳說中好好味嘅Awfully Chocolate，呢個係All Chocolate，真係幾好味！

星期六一瞓醒就過海搵好嘢食，勝香園嘅檸蜜脆脆同蕃茄蛋牛麵想食咗好耐，我哋排咗差不多半個鐘，覺得為檸蜜脆脆排半個鐘係值嘅，不過蕃茄蛋牛麵就有啲失望，蕃茄太酸，我中意食尖沙咀星座冰室多啲！

夜晚同牛牛屋企人食大排檔，冇咩特別！最期待當然係飯後個birthday cake啦，呢個係太子餅店出品嘅黑森林，平靚正！

不過都係上次牛牛家姐生日嗰個dark chocolate好味啲（都係太子餅店），係勁好味！

星期日去咗海洋公園，壽星仔免費呀！仲有餐廳8折，紀念品85折，抵！下一篇再同大家分享！
星期一同牛牛一齊請咗假，其實冇咩做，只係hea吓食吓嘢，去咗中環豚王拉麵，兩點幾過咗lunch hour唔係好多人，等咗十五分鐘就有位喇！

一人一張紙自己剔，我哋第一次食所以樣樣都剔普通，諗住穩陣啲嘛！

普通湯底都好濃味﹑好杰﹑好鹹同埋湯面好油，冇傳聞中咁好食！食完之後飲咗兩杯水再出去買嘢飲！下次都係食番橫綱拉麵！

竟然飲唔晒啲湯！

夜晚又去咗西環盛貿飯店Cafe 508食buffet，今次準時六點半到，終於都食到麵包蟹蓋，勁多膏！

今次食咗拉麵打底，所以只係主攻生蠔﹑蟹腳

甜品幾飽都要食！！

又係門口合照．．．．．．

咁就完結咗三日四夜喪食之旅喇！