兩週年旅行 - Koh Lipe + Bangkok ~ Day1

22/10/2012~29/10/2012
結婚兩週年8日7夜之旅咁快就玩完喇，好唔捨得返香港哩！！希望我有心情同時間可以寫晒成個旅程同大家分享啦！

今次選擇去Koh Lipe + Bangkok因為想一次過滿足晒3個願望～游水+shopping+勁食！Koh Lipe唔係熱門旅遊區，就係貪佢夠寧靜，但交通比較麻煩，多數人會經浮羅交怡去，因為方便少少，但係我已經六年無去Bangkok，實在想去出吓血，所以都係選擇經曼谷去！第一日我哋早機10:45am搭Airasia去曼谷，揀Airasia因為喺舊機場（廊曼國際機場）落，之後轉內陸機15:45pm去合艾(Hat Yai)都係舊機場搭Airasia，咁就慳番啲時間同車錢唔洗轉機場啦！不過泰國舊機場真係無嘢好食無嘢好行，好彩無delay咋。

出發嗰日好好天吖

見到啲雲好想浸番個泡泡浴

泰國舊機場得幾間餐廳，我哋揀咗呢間食lunch等轉機，味道不錯不過價錢唔平又無wifi！

話咁快下午5點幾就去到Hat Yai，一出機場就有人問我哋去邊，因為Hat Yai好似係無的士架，全部私家車／貨van，我哋求其上咗架私家車，300THB去到酒店。司機問我哋之後去邊（想兜生意！）我哋話去Lipe Island，佢就打電話幫我哋問車同speedboat價錢，單程750THB，來回1300THB，其實間間都一樣價錢（除咗經酒店book要1400THB），見佢架車都幾新淨所以confirm了，佢話聽朝830am去酒店接我哋，回程就送我哋去到機場，唔洗自己再轉車就咁就安心晒啦！

我哋住Tune Hotel，係Airasia旗下嘅budget hotel，電視冷氣毛巾wifi咩都要比錢，一晚double bed+12hr冷氣+12hr wifi都只係424THB，即係一百蚊左右，點知wifi用唔到，reception姐姐話可能因為太多住客，真係激死我，我比咗50THB架！！

廁所咩都無，毛巾牙膏牙刷洗頭水沐浴露一概自備，一係比錢！我哋慣咗去旅行都會自備呢啲嘢所以無乜所謂！

wifi用唔到，唯有出去行吓搵飯食，合艾有個night market，不過星期一二都唔開，夜晚真係好靜，完全無嘢睇無嘢玩，好彩比我哋搵到間好正嘅餐廳！廣東菜館～～其實都係食泰國菜的！而且好好味添，我覺得係成個trip最好食嘅一餐！

就係呢間半露天餐廳

泰式炒通菜

冬陰公夠辣又多料，正！

生蝦超大隻，四十蚊一碟有十隻！！！

咖哩炒蟹，咖哩汁撈埋好多蛋醬，又滑又甜甜哋，攪到我唔覺意食咗好多飯添！！

呢餐約750THB。食飽就去士多買綠茶，喺香港機場買咗支Double Black $310，好彩有佢，如果唔係無電視無wifi成晚流流長都唔知點算！！

飲到11點幾就瞓喇，第2日晨早就去Koh Lipe喇！！