睇樓第二擊

上星期六又去咗睇樓，今次係娘家區域 ～ 柴灣，可以放工返娘家食飯，真好！為咗盡快搵到我哋嘅〝牛比之家〝，要努力努力！

睇樓第二擊 --- 高威閣 + 山翠苑

高威閣係私人住宅，樓齡26年，得好少盤，睇左個484呎單位，望到灣景園，不過都唔係好開揚，屋同屋之間都幾近！但係感覺間屋好大，因為兩個房同廳都有窗台，但係窗台係唔計入建築面積，即係送嘅！計埋窗台即係有5百幾呎，好抵咁喎！好似多咗幾張檯擺嘢咁，咪覺得間屋大啲囉！樓下都有個商場仔，有酒樓，行去地鐵站5分鐘左右，不過巴士站好似遠啲(我哋冇試行)，最大問題係價錢唔係幾OK囉，要185萬．．．so 可以再揀吓先！之後我哋就轉戰價位比較適合我哋嘅山翠苑

山翠苑係居屋不過都唔洗補地價，樓齡28年(好似老咗啲！)，所有單位都係4百幾呎，我哋睇左4個474呎單位，第一個就係頂樓28樓，個view勁正！有啲海景，望到對面將軍澳(如果唔大霧！)，空氣勁好，不過山頂，冬天會好凍！另外有兩個都係海景 + 山景，不過全部都要160萬！係得一間低層望樓景開145萬，不過呢間我一入到去見到對面樓就reject咗！揀到山頂咁凍嘅屋苑都係貪個景啫！樓景梗係唔諗啦！！比起之前真係貴咗好多，所以都係再睇睇先！

下一站 --- 小西灣