裝修 Day 51～裝田園廚櫃﹑洗手盤櫃﹑水龍頭﹑冷氣﹑電視收貨

不幸事件接二連三發生，今日裝田園廚櫃我當然唔敢鬆懈啦，同牛牛一齊請咗半日假上去監工！今日竟然有5個師父一齊開工，連埋我同牛牛共7人，好熱鬧呀！原來我間迷你田園屋都唔係好細啫！！

黃生同另一個裝櫃師父十點半開工，我哋兩點上到去已經裝咗下櫃喇！兩個口罩人．．．

價值rmb$498嘅調味拉籃．．．好貴呀！

被遺棄嘅田園玻璃門．．．將會成為垃圾！可惜．．．．．．

裝櫃師父企住嘅三個拉櫃桶都成為垃圾．．．被遺棄之前都有啲貢獻．．．

呢個就係我成日提住嘅cf 喇，拎住嘅係我個Delong雨淋花灑呀，不過今日裝唔切，要聽日再裝！

水喉師父1號

水喉師父2號

我哋上去之前已經裝好三部冷氣，但係不幸事件又嚟喇．．．細房部菱機竟然唔識郁，cf 話應該要換機．．．牛牛即刻打電話去菱機查詢，客戶服務部話4﹑5日後先有人上嚟睇．．．．．．唉！好彩係細房嗰部咋！如果係大房，到時入咗伙都未攪掂真係唔知點瞓！三十幾度呀！！

製成品出場．．．．．．

呢個係未完成嘅迷你田園廚櫃，黃生話下星期就可以造番隻櫃門比我，希望係啦！遠睇都幾靚，不過近睇就麻麻，始終唔係現場造，有好多隙要用白色膠（我唔知叫咩！）填補，仲有入面啲櫃板好黃，好似好舊咁！（影相唔覺）最差嘅係櫃頂唔係貼住天花！！咁咪會藏塵囉！黃生話因為要就插蘇位（喺櫃入面），但係佢度尺時已經整咗插蘇位啦，點解佢唔就番插蘇位整高啲個櫃呢？根本就係佢度尺唔準，藉口！！最值得一讚係個台面現場“介”番短比我，但係竟然一啲都睇唔出，Good！

洗手盤櫃同廚櫃一樣款，不過比我想像中大，而家擔心個浴屏唔知夠唔夠位裝！！

星盤龍頭太大．．．因為我哋想襯埋方形雨淋花灑，但係方形星盤龍頭都係咁大架！即係冇辦法．．．．．．

洗手盤龍頭太細．．．我哋又疏忽咗！應該擺個龍頭埋去睇吓先，如果覺得太細可以換！當我哋發現嘅時候已經裝好咗喇，即係冇得換！

企缸龍頭都係方形！

仲有今年二月已經買定嘅46吋電視終於都送嚟喇，不過下星期先安裝！

裝完廚櫃已經七點半，足足九個鐘！！我已經將要求降到最低．．．．．．

Day 50～廚櫃收貨．．．又一不幸！！

唉．．．都唔知係我黑仔定牛牛黑仔．．．．．．又一不幸事件降臨！

話說兩星期前喺深圳訂嘅廚櫃今日送貨，比預計早咗成個星期本來好開心！今日係cf 幫我收貨，運輸公司2pm打嚟話3pm送到，點知6pm再打嚟話6:45pm先到，因為過關時比海關check所以遲咗，算！最後送到嚟係7:30pm，原來送貨哥哥去錯層數，上咗樓上十幾樓，都算！收齊貨 total 12件，諗住冇問題啦等聽日安裝，點知．．．．．．

我哋放工之後去旺角買埋吸咀先過去，睇睇吓．．．點解塊台面石好似同幅牆差唔多咁長？唔係應該剩番兩呎位比我放雪櫃架咩？咁我哋就攞張圖紙出嚟對吓啦．．．．．．天呀！！幅牆明明係2115mm長，點解張圖紙係2515mm？長咗一呎有多，咁我個雪櫃點算？？

打比黃生話佢知度錯尺寸，佢話轉頭覆（轉頭覆．．．呢句好熟喎！），咁我哋梗係搭車走啦，諗住邊食飯邊等，點知一落車佢就打嚟，話而家上去睇吓，em．．．咁我哋唯有又搭車過去啦，唔通仲約第二日咩！黃生上到嚟一望就知賴嘢啦！傾咗個幾兩個鐘，佢話啲櫃同塊台面石都可以現場"介"，但係櫃門就要重造，都趕得切我入伙，之後嘅運費佢比（梗係佢比啦！）

但係成套廚櫃細咗，即係話對田園玻璃門兩隻只能活一隻，拉櫃桶同拉籃亦只可二擇其一！唉．．．得一隻玻璃門我不如唔要，拉籃梗係重要過櫃桶啦，open kitchen唔通咩鼓油調味料都放晒出嚟咩！我再問黃生：而家冇咗兩隻玻璃門﹑兩個拉櫃桶﹑尺寸細咗，咁係咪退番錢比我？佢話退$300，最後講到$500，其實應該退$1000先啱數呀！算．．．唔好再煩我！唉．．．．．．成套田園廚櫃冇晒靈魂！！

而家唯有照原定計劃，聽日上嚟裝廚櫃～係裝一套唔完整﹑冇櫃門嘅廚櫃！

今晚嘅行程係：放工＞旺角＞九龍灣＞旺角＞九龍灣＞旺角

今晚嘅心情係：驚訝＞憤怒＞擔心＞無奈＞接受

攪掂晒食碗麵返屋企已經十一點幾喇．．．

呢個就係同幅牆一樣長嘅台面石！

裝修 Day 49～裝窗台雲石﹑電熱水爐﹑坐廁﹑電制

仲以為今日冇咩進展，原來已經裝咗全屋5條窗台雲石，“白玫瑰”都幾靚吖！

德國寶電熱水爐成個吊櫃咁，大到哩．．．．．．



Roca座廁，唔知cf 會唔會用呢？



全屋電制板面都裝咗，為咗襯番田園style，我要求唔要Led，只要Clipsal白色大粒制，不過啲板面有啲問題！同埋我見人哋E3000﹑E8000係打橫按制幾型，我咪抄人囉，不過好似怪怪哋！

廚房應該兩個都係插蘇位，而家整咗一個插蘇一個電制，要改！



孖位燈制咁大條隙咪藏晒塵？阿小強兄走咗入去都唔知啦！！要執執．．．



冷氣制又係大條隙．．．



究竟係Clipsal舊款係咁大條隙，定係安裝問題？？

Day 47～電器收貨．．．貼錢買難受！！

事件一

話說我哋6月1日已經訂晒全屋電器，其中熱水爐我哋一早決定咗買German Pool德國寶，不過sales哥哥推介另一牌子～GermanWest萊茵（又好似叫西德寶），佢話同德國寶同廠，內膽係全銅，德國製造，仲有永久保養．．．我問佢點解唔覺有人用，佢話其實好過德國寶，只不過德國寶賣牌子比較出名．．．佢話呢隻GermanWest萊茵啱啱做完特價，不過我買咁多嘢，可以照比埋特價我（比德國寶平$50），見佢講到咁好，我哋又即管信佢啦，唯一擔心係尺寸唔啱，因為我哋廁所太細，之前裝修cf 已經幫我哋預咗安裝德國寶嘅尺寸，sales哥哥話冇問題﹑一定裝到﹑同德國寶一樣尺寸，如果真係唔啱尺寸可以換貨，咁我哋又信佢啦！返到屋企都係唔放心，諗住上網search吓GermanWest萊茵嘅website，睇吓尺寸係咪真係一樣．．．．．．點知GermanWest﹑萊茵﹑西德寶都冇website，連有關資料﹑有冇人用過﹑comment．．．都冇！！究竟有冇呢個牌子架？？最後問到一間專賣／維修電熱水爐嘅公司，竟然話冇可能係德國製造﹑冇可能永久保養！！天呀．．．．．．第二日我哋即刻打返去話要換返德國寶，聽電話嘅人只會話「留電話，叫落單同事覆你！」幾日內前前後後打咗廿幾次電話先搵到阿sales哥哥，佢答應換貨但係冇問原因，好詭異囉．．．．．．

事件二

落訂時電器鋪話全部有貨，預早4日電話約送貨就可以，我哋預鬆咗10日前已經打去約今日（星期六）送貨，點知每次都係話「留電話轉頭覆！」．．．但係個頭轉咗一星期都冇人覆，中間打咗十幾次電話都係話轉頭覆．．．．．．星期四我哋終於忍唔住要親自去電器鋪約送貨！答覆竟然係「星期六送貨冇問題，不過有一部窗口機未有貨，遲啲覆！」．．．．．．之前又話全部有貨，而家又話冇，仲要遲啲覆！真係O晒咀！！星期五直接打比老闆娘，終於確定有貨！不過由始至終間電器鋪都冇覆過一次電話比我哋！！！

事件三

電器鋪話2-4pm送貨，我一放工就趕過新屋同牛牛食嘢然後等送貨，cf 收咗工，咁牛牛就掃吓地準備吓（我咪睇住牛牛掃地囉），等咗個幾鐘都冇聲氣，我哋索性落McDonald鬆一鬆！等到4點都冇電話，打比老闆娘，佢竟然話仲有一部冷氣未有貨！！都唔知仲要等幾耐，我哋決定返屋企等！（係而家住緊嘅屋企！）最後係6點半先送到，牛牛自己搭車過去收貨，我已經冇精神同佢玩喇．．．．．．

＊全部電器未安裝，未知有冇問題！千祈唔好有問題呀！！！

奉勸大家一句：千祈唔好貪平一百幾十．．．．．．真係貼錢買難受！！

百誠電器（又名安力）～太子道90號地下（維景酒店對面萬寧側）

電話：23938543

裝修 Day 46～裝鐵閘﹑門鎖

原本預計3星期先有鐵閘，點知今日收到電話即日送貨安裝﹑拆埋舊閘走，Good！足足早咗一個星期！不過唔知係咪因為大趟款，又要就番鐵花嘅尺寸（應該只有一個尺寸），所以啲比例有啲怪，中間嗰幅好似好窄！中間嗰幅係提子花呀，好似少啲人用！整體嚟講都好靚，滿意！

仲有之前大陸買嘅古典歐陸門鎖同失而復得嘅田園花花門鎖都裝好喇！不枉我對花花門鎖咁專一，比cf 掉咗都要買番一樣款，裝好咗之後仲靚呀！！



房門有鎖匙，廁所門冇，因為如果有人喺廁所發生意外，只須要用硬幣就可以開到鎖，唔須要用鎖匙，我都係尋日買鎖先知！！

但係原來廁所個鎖係有少少唔同色，冇咁靚呀！！

門頂都裝咗，呢個有花紋嘅係大門，不過唔係我 first choice！！因為 first choice得番display，所以揀咗呢個脹卜卜肥仔款襯番牛牛，哈哈哈！！

又繼續批灰．．．燈槽變咗白色喇，係咪順眼咗？

牛牛發現咗四隻門嘅頂位都冇封口，點解會咁？？係未整好定係間鋪偷工減料？？聽日問吓cf 先！