裝修 Day 45～窗台玻璃／雲石﹑又買花花門鎖

今日放工又要做苦力！去旺角接返之前訂嘅窗台玻璃同埋雲石去新屋，仲有買咗三個花花門鎖！睇開我個blog嘅blog友仔應該知道我之前喺大陸已經買咗三個靚靚花花門鎖，rmb$50@，點解今日又買多三個？？因為阿cf一個唔該將我啲花花門鎖當垃圾掉咗！！真係激死人．．．．．．

玻璃窗台（廁所用）

呢條咁有型嘅“結他”就係之前所講嘅紫色焗漆水珠款玻璃窗台！原本想整埋玻璃吸咀，但係cf話危險容易爛，同埋太貴，所以放棄咗！

啲水珠幾得意，廁所用好襯！不過加埋凹凸波波磚同埋馬賽克唔知會變成點．．．．．．

$295四呎半長，呢間鋪專賣玻璃架，旺角好似得一間呢類鋪頭！

匯俊工藝玻璃有限公司～旺角上海街724號地下
雲石窗台（廳房用）

呢條係窗台雲石，窗台得兩吋咋！（因為係舊樓囉！）揀呢隻白色叫“白玫瑰”，個名幾正！！本來想門口吸咀都用呢隻“白玫瑰”，不過天然雲石會食色，所以門口吸咀就唔可以用喇，如果唔係好快會黑晒！我又唔想用深色，所以星期六又要去揀過，可能會用人造石！

總共5條 total $380，辛苦牛牛喇～

鋪頭老闆都幾好，幫我哋call van仔去新屋，因為雲石太長上唔到的士，佢仲幫我哋攞埋上車，旺角去九龍灣都係$50咋！

廣泰雲石公司～九龍旺角道29號B1地鋪

花花門鎖

呢個係香港貨！$120@，買咗三個，cf 比錢！！