仲有兩個月就到Big Day，暫時都冇興奮或者緊張感覺，反而好擔心．．．．．．由上年年尾決定結婚開始，已經諗定結完婚就會轉工，因為而家份工又冇發展又搵唔到錢，啲同事仔又中意講是非攪小圈子，做得唔開心！呢間公司唯一好處就係冇壓力唔洗OT，可以比我有足夠時間攪結婚同埋新屋，所以呢一年都係hea住做，對得住份人工就算數！
但係最近壓力開始嚟喇，我都唔明啲人點解咁中意明爭暗鬥，為咗博上位去篤人背脊﹑拉攏同事﹑奉承高層．．．我唔想玩呢啲呀，我都係想hea多兩個月啫，唔好煩我啦！而家仲要追target，我卒人數又要比人卒數，真係越做越冇心機！
好想hea盡啲等公司炒我，賠一個月錢比我走仲好，但係我又做唔出！或者自己resign，坐多一個月走人，但係牛牛又唔想我結婚前resign，因為計埋大假婚假，到時結婚可以放半個月有薪假，如果而家走咗又唔會搵工，咁呢兩個月就冇收入！就算真係搵到工，到時都唔可以請咁多日假啦！所以我唯有忍耐埋呢兩個月！
另一個問題係兩個月後我搵咩工呢？唔想再做呢行，但係唔做呢行可以做咩呢？我都唔知自己想做咩！轉行即係由零開始，要接受低收入低職位，要重新累積經驗．．．其實我都預咗，我只不過想搵一份安定﹑唔係太大壓力﹑做得開心嘅工，真係咁難？
沒有留言:
張貼留言