龍鳳被都咁難揀．．．．．．

突然間發現原來要買龍鳳被喎，之前都冇諗過添！！我問媽咪係咪一定要買紅色，媽咪話冇所謂，都唔一定要有龍有鳳，最緊要我中意，好嘢！！佢仲話如果我哋自己去買就封番封利是我比，乜原來龍鳳被係媽咪買架咩，我唔知喎！

見到blog友仔Yuen and Fred話casablanca大減價2折起，咁我哋放工咪去太子始創睇吓囉，不過睇唔啱呀．．．跟住過隔離雅芳婷，啱feel 喎！牛牛家姐之前都買過Melody床單比我哋，質地都ok呀，可能我對床上用品冇咩要求（點都瞓得著！）

唉．．．我嘅選擇困難証又發作．．．竟然睇中咗4個款，你哋話點算？？

A）深紫色梗係靚啦，呢款係「婚慶系列」，好似都好多人買咗呢個款，不過我唔覺得好婚慶 feel，同埋我間房係紫色﹑窗簾又係深紫色，再加埋呢個深紫色就成間房都好深色，會唔會過份咗呢？

B）呢款都係「婚慶系列」，都幾結婚 feel 吖！雖然啲花花有少少"娘"，不過加埋對天鵝又好似幾靚喎！不過點解唔覺有人買呢個款？係新款？定係大家覺得唔靚呢？？

仲有呀，呢兩款「婚慶系列」都有免費繡名服務架！好特別呀～

C）呢個係清清哋嘅玫瑰花，可能呢排search田園style成日見到呢啲碎花，睇睇吓又好似幾順眼喎！以前唔“發花顛”嘅我而家都有少少中意“佢”！

D）最後一位佳麗就係～～～Kuromi！又係紫色又有月亮，好浪漫呀！我已經有兩套Melody但係一套Kuromi都冇，好似好偏心嘛！其實好耐之前已經睇中呢套不過唔捨得買，而家有藉口買喎！

其實呢四個款都可以平時用，唔會嘥！頭三款係550針，Kuromi 就得330針，不過而家A-Fontane得8折（好似成日都8折！）我哋床單係普通雙人，不過被套要加大，以上四款床單＋枕頭袋＋被袋 total $8xx，因為被芯我哋有唔洗買！大家知唔知A-Fontane幾時會有大減價呀？同埋揀邊隻款好呢？