菲比小妹Blog: 11月 2010

17/11/2010

上年菲比小妹生日同牛牛去咗揀結婚戒指，今年就變咗牛太太第一個生日喇！
幾年前已經話今年開始唔再慶祝（年紀越來越大喇嘛，費事比人問幾多歲啦！

），亦都冇晒大假（攪裝修／結婚／honeymoon 放晒啦！），所以如常返工！

不過今年生日返工特別sweet，牛牛一早整早餐比我食（其實日日都係佢整，咪就係三文治＋咖啡咁大把囉！），之後一齊搭車返工（其實日日都係！），又一齊食lunch，一齊放工，夜晚一齊食壽司，一齊返屋企．．．．．．simple but sweet！

9年嚟我同牛牛都冇送禮物嘅習慣，無論係生日﹑拍拖週年﹑情人節﹑聖誕節．．．．．．因為大家都唔想為慶祝而買啲冇必要或者對方唔中意嘅嘢！今年比一班豬朋狗友陶毒咗，同牛牛齊齊走去出iphone4，牛牛仲話送比我做生日禮物添！

用咗我哋對結婚戒指做wallpaper

牛牛又批准我買皮褸比自己做生日禮物！諗咗幾年終於捨得買喇！

仲有小禮物添．．．大頭Monchhichi，我幫佢改名叫“小可愛”

粉紫色Monchhichi，未諗到改咩名添！

突然間覺得自己好幸福，有個溫暖的家﹑有隻好錫我嘅牛牛﹑有班好開心嘅豬朋狗友．．．．．．只係欠一份好工！哈哈！！不過我都好滿足喇！

3點半有船返Inocean Villa喇，得我哋兩個包船！

仲有兩個工作人員陪我哋

閃閃發光嘅大海呀！

又返到 Inocean Villa嘅reception喇，牛牛話請我飲媽媽奶 >_<"

本來以為埋完單就搭seaplane去馬里，點知收到通知seaplane delay到5點呀！又多咗一個鐘唔知做咩，又周圍影影影．．．．．．

睇吓牛牛幾嘆！

牛牛喺梳化後面做咩？

又坐番呢個餵魚位囉，不過冇晒麵包喇！

呢條唔知咩魚，起碼有一米長！

影完一輪相牛牛竟然眼瞓！唔制呀．．．我點都唔會瞓架！！就快走喇，望多個海幾眼先！

好大一個海．．．

前面兩塊木板就係我哋上seaplane嘅地方喇，等陣會搭船過去

人哋玩完house reef snorkeling返嚟呀．．．冇我份！

原來餐廳出面有toile，不過入面好黑架．．．

終於要走喇．．．又係搭自家快艇

架seaplane真係細到要“捐”入去架！

呢程seaplane會去第二間resort 接guest，所以冇得揀位坐！坐中間就會遮住晒！

再見喇 Inocean Villa！！

好唔捨得呀．．．

返到Male水上飛機場喇

呢架seaplan好型，黑白色好似戰機咁！

要再轉車去機場，幾分鐘就到！

一落車會有resort staff 點名，確保所有guest都齊晒！之後會問你join唔 join free trip去 Male市中心行吓，係resort 包嘅！只係要比us$1（一程）搭船過馬里市，比us$3 就可以放低行李有人幫你睇住直到上機，我哋兩個人一個喼即係total us$7，仲有個guide帶住and講解，一pair一個guide，你覺得佢好嘅可以比小費，我哋個guide叫Mike，nickname係Orange！

佢自己都唔知點解，好攪笑！！

呢張係馬爾代夫幣$10，等於us$1，Mike借比我影相！

Male市好細，真係冇咩睇，都係建築物嗰啲囉！不過Mike都幾nice，除咗講Male歷史，又會講吓啲特別嘢比我哋知，原來馬爾代夫係冇中學架，讀完小學想再讀就要出國喇，最近嘅斯里蘭卡，或者新加坡﹑馬來西亞﹑菲律賓．．．．．．佢話Male有個地方有free lunch﹑free dinner﹑free snorkeling，叫我哋估係邊度．．．

原來係監獄！！Male監獄得廿幾人，都係因為吸毒而坐監，Male係冇罪案嘅！

新增說明文字

之後再去市場and魚市場，不過魚市場收晒工喇，市場就冇咩特別，試咗啲當地零食，好難食！呢啲蕉and辣椒好似玩具！

個幾鐘就行晒成個馬里市，Mike帶我哋去手信店，有得坐﹑有免費氣汽水，我哋飲完汽水咩都冇買！Mike同手信店staff 都冇黑面，幾好！

嗰時7點咋，Mike問我哋食飯定返機場，有得揀我哋梗係話返機場啦！！之前有blogger話個guide帶佢哋去食飯食咗成千蚊呀！！

返到機場7點幾唔比入閘，8點先可以入去check in．．．個機場都唔算勁細，有兩間餐廳，幾間手信店，手信可以斎睇唔買．．．一個雪櫃磁石貼都十蚊八蚊美金，一個相架十幾廿蚊美金．．．．．．我都有好多免費紀念品啦，一於唔買

！！