嘩．．．超多人呀！好似年三十晚咁呀！不過有嘢睇有嘢買就冇有怕啦．．．行咗兩個鐘都有少少收穫，買咗個吉仔風車，其實我覺得桃花款靚啲，不過牛牛話桃花款好多人買，吉仔款得意啲特別啲，咁又係！離開維園之後發覺風車左邊嘅吉仔比較稀疏，數一數有12粒吉仔，好似冇咩問題，點知見到有個女仔拎住同款風車行過，牛牛極速數埋人地嗰個．．．有13粒吉仔呀！！嗚嗚嗚
～～我真係少咗粒！算啦，家姐話13唔好意頭，12好啲喎！
原來個風車好大，可能係我間屋太細．．．
仲買多咗個「心想事成」掛飾，兔兔好得意呀！
有一檔賣“立雜嘢”嘅，見到我之前淘寶買嗰啲“老翻Anna Sui”系列，rmb$9.9嘅化妝棉盒佢賣$40！！都幾好賺！不過我都幫襯佢買咗個Q版掠衫夾，掠襪仔啱晒
！鴨仔好可愛，$10抵呀！
今晚放工就去咗旺角買糖糖，不過全盒睇唔啱款，所以用咗個玻璃兜頂住先！其實個玻璃兜係之前特登去花墟買嚟浸水仙架，點知嫲嫲話唔啱用！咁就用嚟當全盒唔好嘥啦！
最重要係加封利是，得咗！
嫲嫲年年都會浸幾盤水仙，靚過出面賣嗰啲架！上面嗰盤係我嘅
我特別要求迷你版，放喺電視櫃剛剛好！
希望今年都開得靚靚啦！
其實我想問．．．水仙咁香又咁多人中意，但係點解冇水仙味嘅香水呢？？
（唔好誤會，我並唔係想買！只係好奇問吓啫！）好有新年氣氛呀！
喺花園街又買多個Melody掛飾，夠晒大個！
幾靚！！
今年嘅新年佈置都7788喇！希望新一年開開心心順順利利啦！
我就係買咗桃花款啦, 入到去, 真係見個個揸住, 不過真係好靚, 忍唔住買咗 >< 我買貴咗, 買咗四十蚊, 後尾見到有檔賣三十五蚊咋!!!
回覆刪除[版主回覆02/02/2011 00:26:00]係呀,桃花款真係好靚呀,女仔實中意! 四十蚊真係貴咗呀!靜靜雞話你知,我買嗰個$33呀!不過一年一次,貴幾蚊唔緊要啦!最緊要轉個大運返嚟!!
嘩！個吉吉風車真係變大咗喎！ 盤水仙今朝半粒花都未開呀！好担心開唔切！希望今日暖Ｄ可以趕得切開花啦！ 我地今年有貴人幫助冇有怕！ 不過最緊要都係自己努力！揸油呀！！
回覆刪除[版主回覆02/02/2011 11:35:00]我嗰盤淨係高咗咋!牛牛話遮住佢睇電視! 今晚開暖風機比佢先!
really "Home sweet Home" wor~!!!
回覆刪除[版主回覆02/02/2011 11:37:00]第一次新居過新年,梗係要有d氣氛啦!
兔兔揮春我都有買呀, 我買左個"年年有餘"
回覆刪除[版主回覆02/02/2011 12:03:00]今年d揮春好似特別靚呀!!買吓買吓成屋都係!
好有心思呀！ 祝妳今年事事如意，心想事成，身體健康！
回覆刪除[版主回覆02/03/2011 00:34:00]我都祝你兔年事事順利,笑口常開!!
恭喜發財! 好有新年氣氛呀~
回覆刪除[版主回覆02/07/2011 10:28:00]祝你兔年事事順利,笑口常開!!
哈哈!!新年快樂!!!心想事成,我都有行維園!!!我見不到隻鴨鴨夾
回覆刪除[版主回覆02/07/2011 10:29:00]鴨鴨夾得一檔有得賣咋! 祝你兔年事事順利,笑口常開!!
哈...菲比小妹新春大吉呀!身體健康、步步高陞、少勞多得~~~永遠青春美麗....牛牛永遠咁錫你~~~YEAH!
回覆刪除[版主回覆02/08/2011 15:52:00]少勞多得正喎!!!
我都祝你心想事成,事事順利,要乜有乜,兔年行大運!!
你好嗎!之前參觀過你間屋,我都去左裕興發到訂左D家私呀,你間屋真係好靚呢!
回覆刪除[版主回覆02/28/2011 16:33:00]多謝你! 收貨未呀?滿意嗎?
我1月頭收哂貨喇,以呢個價錢訂造都算ok啦,當然有好多瑕疵架,好在d cfu上黎裝都算ok^o^!
回覆刪除[版主回覆03/03/2011 21:43:00]的確係有瑕疵,一分錢一分貨,都可以接受啦!!
睇左你個blog喇,你間屋都好靚吖!!