Day4 ~ Koh Lipe - Phattaya Beach

今日無join tour，全日hea hea hea！！一食完早餐就周圍影相，Sita Resort環境真係唔錯，Thai feel得嚟乾淨企埋，唔會有蛇蟲鼠蟻！

正門對住大海，nice！

Lobby門口有個可愛肥公仔，忍唔住要同佢合照

側邊係餐廳，餐廳後面有間手信店，我哋無入過去，resort 嘅手信都唔慌平啦！

直行就係一個大泳池，我哋無游泳池，一場嚟到梗係游大海啦！！

泳池側邊有小朋友設施，人少少我扮住小朋友先！

泳池側邊同後面都係酒店房，我哋揀 "Pool View Deluxe Double"，就係喺正泳池後面呢間！

有露台

有兩張sun chair，除咗影相之外無坐過！！

影完一輪相就換衫出去同陽光玩遊戲喇！YEAH～～～（有無人可以幫我執走後面個姨姨！？）

今日天氣比尋日好，不過都係厚雲！！成個沙灘得幾個人。。。

Resort 出面有beach chair 任坐，坐足一日都無人理你，唔會好似長灘島咁有人埋嚟問你飲咩，即係＂零燒肺＂，good！

例牌動作～跳跳跳！

下水禮～

我望咩？前面有兩父子（外國人），個仔仔好肥，貌似十幾歲唔識游水，睇住爸爸教佢學游水好好笑！無錯，hea嘅日子就係咁無聊！！

沙灘側邊有間resort 自成一角好似好正咁，之後上網睇番應該係Sanom Beach Resort，個景係好正，不過太簡陋喇，我唔敢住囉！

終於影到幾張相係無人喇！我霸晒成個海！oh oh～～

牛牛話要多角度拍攝。。。

我喺度執緊珊瑚碎呀！

影吓相游吓水周圍啲人就走晒。。。玩到十二點幾真係頂唔住，太熱喇，我哋都要徹退。。。去walking street搵嘢食！

呢間餐廳平平哋啲嘢都幾好食！但係我熱到無表情無反應牛牛話枱面罐青檸梳打好好味，仲想買番一打半打番香港，但係我唔知汽水可唔可以搭飛機囉！最後梗係無買啦！！

泰式海鮮炒河

燒豬頸肉，好肥不過好好味

熱辣辣食咖哩真係會噴火架！

食完lunch 牛牛話好熱要食雪糕，成條walking street 有好多間士多，但士多嘅雪櫃全部空架！！好奇怪唔知點解！最後搵到呢間有雪糕賣，牛牛仲連食兩日添！！

walking street 就係一條直路

除咗餐廳之外，有幾間賣衫賣泳衣嘅鋪頭，泳衣THB500@都唔平架！我當然無幫襯啦，要留番彈藥去Bangkok 呀！！

右邊嘅鋪頭裝修中，其實有好多鋪頭都未開，可能10月仲係淡季啦，high season應該會熱鬧好多！

由於太熱關係，我哋決定番酒店沖個凍水涼，一番到去就見到呢隻象仔戴咗牛牛副眼鏡，笑死我！梗係清潔姐姐嘅傑作啦！我哋住咗3日，3日嘅毛巾都係唔同design，清潔姐姐真係有心思！

hea到三點幾又出動喇！成個沙灘無晒人，我哋包場咁呀，正！！

有酒店狗狗陪我哋，佢哋好中意喺有人坐嘅櫈下面瞓覺，無人坐嘅櫈佢哋唔會埋去，好得意架！

浮潛完一輪就五點幾喇，Sita Resort 職員每日呢個時間都出嚟做運動，好似古代玩嘅＂束菊＂（唔識寫），即係踢波囉，不過個波迷你啲之嘛，女職員就坐埋一邊睇波同吹水。。。簡單嘅生活就係咁開心，開心嘅生活就係咁簡單！！

下一篇會有浮潛影魚魚，不過等我得閒寫先啦！