Day6 ~ Bangkok - JJ Market + Asiatique

2012年10月27日，即係我同牛牛結婚兩週年嘅日子，原本我planning係行JJ Market + Spa，又可以shopping又可以懶浪漫懶relax咁做個雙人spa，聽日就行商場 + Asiatique，全日都有冷氣咁咪無咁辛苦囉！點知間spa早十日都book唔到，所以就變咗今日行JJ Market + Asiatique，聽日行商場 +spa！

今日應該會係成個trip最艱辛嘅一日囉，事前我已經幫牛牛做咗好多次心理輔導，希望佢唔會覺得比我賣咗豬仔，或者中途離場咁掃我興啦！！晨早9點就去嘆個豐富早餐义足電，Centre Point 嘅早餐buffet 比起Sita真係好太多！不過人亦勁多，餐廳三個area都坐滿晒！好彩食物款式多refill快，唔會無嘢食！

每朝都食三杯yogurt

食飽飽出發！首先買張one day pass THB130（如果唔係去翟度翟就唔洗買，因為單程去Central,Siam等等都只係THB20）見到ticket上面Krabi張相。。。好想去呀，之前plan咗兩次都去唔成！希望下年可以去吖！

11am到達目的地，其實我target唔係買衫（當然都有買少少啦），主力係睇家品同香薰！好想買波波燈呀，嚟咗三次都係無買，因為我間蝸居實在喺無位掛呀！

呢間香薰店格局唔錯，梗係有幫襯啦

lemongrass essential oil 15ml THB150, 60ml THB450，大嘅比自己，細嘅比家姐

香薰爐THB160大大個，買咗個紫色

老翻franc franc杯碟，當然都有入手，姨姨仲收多我錢，好彩我醒目返轉頭同佢講，點知佢又計錯數，收少咗我THB20，即閃無仇報！

鐵藝鳥籠呀，兩年前搬屋已經話買，最後又係無位擺無買！

見到呢間好多蝦好大隻，不過太熱喇，無食到！驚牛牛中暑！

原本想去Or Tor Kor Market食嘢，點知行咗好耐都搵唔到，諗住入地鐵站由第二個出口去，無意中見到呢個food court 有冷氣，我哋決定唔搵喇，就地解決！！

分別喺三檔買咗三款麵，啲人都好唔熟手，我估呢個food court都係新開的！

就係呢度喇，喺地鐵站入面的，隔離仲有個toilet唔洗比錢，唔係太多人，都算乾淨（JJ Market入面toilet要比錢架），休息完又行過！

地鐵站出去JJ Market 嗰邊鋪頭裝修靚啲，無咁熱行得舒服啲，比較日系，但價錢都貴啲！

某間鋪頭養的狗狗，行catwalk 咁好有型，勁多遊客跟住佢影相（我係其中一個）

傳說中嘅椰子雪糕呀！！以前嚟過兩次都搵唔到，今次終於有得食喇！Yeah～

THB30可以自選兩款topping，我揀咗粟米粒同椰果，真係好好味！但其實最好味係免費派發嘅新鮮椰子水，因為個椰子要裝雪糕，所以入面嘅椰子水就倒晒出嚟儲起佢，排緊隊時姨姨已經自動比杯你，我飲咗兩杯添！

唔覺唔覺已經5點幾，即係已經行咗6個鐘喇！！我再同牛牛做心理輔導，問佢係咪真係轉戰Asiatique，因為驚佢太累頂唔緊！牛牛知我好想去，當然話去啦！咁我哋就極速返酒店放低戰利品，再搭BTS去Sapan Taksin站搭免費船仔

630pm勁多人排隊搭船，一架船可以坐／企好多人，所以等咗幾個字就上船喇

對面岸有間河邊餐廳，唔知點去架呢？

有位坐唔洗企

Asiatique有十個倉，賣嘅嘢其實同JJ Market 差不多，當然會貴少少，不過有冷氣夠寬敞好行好多，但我個人嚟講都係中意JJ Market多啲！

好多好靚嘅餐廳，但價錢一啲都唔靚！

仲有live band，我哋當然無埋去睇啦！shopping緊要啲！

坐上去影相都要排隊呀！

泰國特產蝴蝶袋，其實我第6次嚟泰國係第一次買！！因為要幫牛牛姐姐買，所以我先會買埋一份！唔入過去都唔知原本係咁平，唔怪得之個個都大手入貨！果然係手信首選！！

牛牛＆羊羊

好多點點杯碟呀，平過淘寶，但我屋企已經太多杯碟喇，有得睇無得買！

又係波波燈，唔好引誘我啦。。。

行咗幾個鐘要醫肚喇，我同牛牛講＂今日係結婚兩週年不如食好啲＂（我心諗好多餐廳好靚有牛扒有生蠔有紅酒），佢竟然話要食Pizza！！我估佢都係想快啲食完返酒店瞓覺！！好啦，其實我都累爆了。。。

呢個set勁抵，好似係THB399，加埋汽水任refill都係百幾蚊！

今日行咗十個鐘嘅收穫！！