一早已經諗定全屋嘅門一定要白色，襯番田園style！
之前都睇過幾次，出名嘅和富﹑泰華比較貴，最後我哋決定幫襯加州木業，今日落咗去訂番上次睇中嘅款，但係價錢比預算貴咗少少，因為cf度嘅真實尺寸比我哋上次自己估計嘅大咗啲！呢間係實價冇價講，不過唔算貴，姐姐好好人，知我哋咩都唔識，講解得好詳細，幫我哋上咗一個小時大門速成班！不過其實有啲都唔知姐姐講乜！！
我哋要買三套空心房門連門框門線，一套實木大門連門框門線，不過上次sales哥哥唔prefer我哋大門揀浮雕款，佢話係痴上去唔襟，耐咗可能會爆，因為我哋係揀普通實木，如果要耐用就要咩櫸木﹑楓木﹑桃木嗰啲，閒閒哋都要三﹑四千蚊，仲未計門框門線！我又唔想揀啲standard 嘅田園款，所以最後揀咗以下嘅白色手掃漆波浪紋款，呢個款都有少少田園feel，又有少少特別，好似得加州木業有呢個款咋！大門exactly係呢個款，廁所同房門就會將上面兩個框框merge一齊變咗上大下細，咁成間屋嘅門都會係同一系列但係又有少少唔同！
cf 話呢間啲門都OK，不過梗係唔夠和富好啦．．．我都知！但係呢間價錢又好好多噃！！
實心大門 $1230﹑門框 $500，空心廁所﹑房門 $830@﹑門框 $400＠﹑門線 $80@，Total $5740
加州木業～上海街700號F鋪
牆紙
之後買埋白色磚紋牆紙，都係之前睇個款，日本出產，諗諗吓都係牆紙比較方便﹑經濟！講價平咗廿蚊，十碼 $530
多麗裝飾材料中心～上海街600號地下
廚櫃度尺
攪掂晒之後就去新屋等黃生度尺造廚櫃同洗手盤櫃，約咗730pm，佢遲到＋唔識路，830pm先到！我呢個未痊癒嘅病人企喺間沙塵滾滾嘅屋入面等咗粒幾鐘．．．呢個傳說中嘅香港師父黃生，似乎只係一個長註香港嘅大陸師父！不過佢度尺都幾仔細，星期六上去傾埋啲細節，希望三個星期後有驚喜啦！
你好快手喎~~~澎澎聲咁前進喎!! 仲挨到病左添..陰公~有時間休息多D啦^^
回覆刪除[版主回覆06/09/2010 00:39:00]原來我哋好趕呀!樣樣都話3星期起貨,都預佢哋有遲冇早啦,好驚7月頭攪唔掂!
仲未好返晒?? Take care baby!!
回覆刪除[版主回覆06/09/2010 00:38:00]未呀...睇咗第二個醫生!
你真係要小心身體呀～ 度門好靚呢，我適合你田園FEEL呀！
回覆刪除[版主回覆06/09/2010 09:56:00]多謝...
我都好like呀!!
500好似只包4R相咋~而且佢公司喺青衣!
回覆刪除[版主回覆06/09/2010 13:31:00]佢話包photoshop 10張晒4R,不過all soft copies都比晒我 青衣好遠喎!!
我都好鍾意白色磚牆呀!!!
回覆刪除你要小心身體，快d好番啦~
[版主回覆06/09/2010 22:33:00]唉．．．今日間嘢話訂唔到貨退番錢比我哋！又要問過第二間！
以下是我的經驗, 給準備買門的業主一些建議, 我在加州買的四隻胡桃木房門用左唔夠半年有一隻有蟲蛀, 上網search知道叫做蛀木蟲(不是白蟻), 網上資料話蛀木蟲可潛藏在木內3-5年, 在木內繁殖然後蛀出表面, 我打過電話去搵旺角店的梁小姐(幾百蚊隻門冇想過佢會換, 換左都唔敢再裝, 師傅人工都要錢, 只係打去睇下有冇建議), 點知佢話有好多客 打返去話隻門有蟲蛀, 佢同全部客講都話係白蟻, 係個客屋企問題, 我同佢講網上話係蛀木蟲, 佢話未聽過... (唔信可自己打去試) 蛀木蟲似乎不會infect附近木製傢俱, 而我其他3隻門好彩仲未見到蟲蛀, 所以我暫時用biokill噴左有蟲蛀隻門(想睇下其他門有冇問題, 唔想搵師傅上來幾次, 人工好貴), 好似蛀慢左, 不過已經好多個小洞, 我估最後都要換... 大門我在另一間貴少少的鋪買 (不是和富, 太貴), 送來後發覺質素好加州好多, 我在加州買房門係因為我只要胡桃木紋, 覺得間間差唔多, 所以搵間平d睇落又ok的鋪頭, 點知... 最後只能說最好不要在加州木業買門, 寶龍(我師傅推介)及另一間價錢都很平的(不記得名字)也不好, 去睇完門睇下自己隻手就知點解
回覆刪除[版主回覆08/28/2010 16:40:00]已經買咗都冇辦法啦,暫時未有問題,到時有問題先算啦!
多謝分享!