Day 40～裝寬頻，買吸咀﹑雲石﹑花灑龍頭﹑廚房磚﹑燈燈

大家有冇發覺好多日冇update個blog呢？唔係我懶呀！因為同住嘅J小姐新屋裝修完成喇，佢早幾日搬走咗，條寬頻都搬走埋，所以我幾日都冇得上網呀！慘．．．

裝寬頻

今朝9點電話嚮，有人上嚟裝寬頻，yeah！點解咁早？因為今日行程好緊湊呀！一攪掂即刻落街繼續買買買．．．

玻璃窗台/扶手

首先去睇玻璃，本來想窗台扶手用玻璃，見朋友仔整咗成吋厚好靚，原來好貴架！6條要成二千蚊！最後我哋只係訂咗一條，for廁所企缸個“博”位，揀咗隻紫色焗漆水珠款，係咪唔明？冇影相呀，到時有製成品再比大家睇！一條都要$295，其他都係用番雲石算喇！cf 話吸咀唔可以用玻璃，怕危險容易踩爛，咁唯有又係用番雲石啦！

雲石

跟住就去睇雲石，想要白色襯番間屋，不過白色都好貴，睇唔啱都係遲啲先買！不過上星期訂咗2條 for企缸嘅，芝麻灰色有特價，2條$140，順便攞埋走。

就係下面呢2條雲石，勁重！塊紙皮係cf 畫比我哋去買企缸“博”位塊玻璃，唔驚錯size嘛！

花灑龍頭

第三站去帝朗Delong買晒全屋花灑龍頭，之前一早睇中個方形雨淋花灑，仲有方形洗手盤﹑星盤龍頭，早幾個月上海街分店裝修半價呀！不過嗰時我哋都未開始裝修所以冇買，而家得75折咋！同埋嗰時想水龍頭都買埋田園款，不過太唔實際喇，壞咗牛牛又唔識換！

原來套裝啲款可以改，雨淋花灑＋套裝又可以再平啲，Good！雨淋花灑跟一個普通花灑$1388，龍頭4個套裝（洗手盤龍頭＋星盤龍頭＋企缸龍頭＋5速花灑）$1658，兩樣一齊買唔要個普通花灑減$300！不過我哋用台上面盤，所以洗手盤龍頭要轉高身款加$100，即係Total $2846。本來牛牛家姐比咗個Grohe洗手盤龍頭我哋，不過係矮身款唔啱用，嘥晒！帝朗好似話係大陸名牌，唔知係咪大陸造呢？不過質量幾好，又有5年保養，送貨要$100，所以我哋自己攞走，重到哩．．．手到軟埋！

磚

攞晒啲嘢返屋企之後又北上喇！今次得兩個任務，就係去深圳田貝北路買磚同埋買燈！因為廚房有條柱位，cf 計漏咗，所以要上去補多6塊磚！其實上星期上去已經要買呢幾塊磚，不過我哋傻仔，冇打電話上去落order，諗住幾塊會有現貨，所以今日又要再去！因為運費都係一噸計要$250，我哋寧願自己上去攞，順便行吓街買埋燈！

就係呢條小小嘅邊位，我哋要上上落落走兩轉！

燈

最後一站就係要解決我哋嘅終極大難題！話說我哋北上睇燈都睇咗4﹑5次，未開始裝修已經買咗主人房同廚房燈，唯獨客廳同電腦房燈睇極都唔啱，真係中意嘅款又太大（應該係間屋太細！），一係就唔襯間田園屋！今日我哋下定決心一定要買到先准返香港！果然有志者事竟成，好快喺家合居揀到！嘻嘻．．．．．．其實就係我一開始做 research搵到嘅款！兜兜轉轉都係揀番最初睇中嘅嘢，嘥咗咁多時間！

呢盞係客廳燈，通花蝴蝶透光位有塊透明閃粉膠片，開咗燈好閃架，仲吊住啲蝴蝶飛吓飛吓，可以用慳電膽，我哋唔中意用米仔膽（水晶燈多數都係米仔膽）！呢個款淘寶都有得賣，之前唔考慮係因為買咗嘅人comment 啲蝴蝶碎晒，所以我唔喺淘寶買！家合居個哥哥仔攞盞新嘅比我，不過一打開都有好多隻蝴蝶係爛嘅！我逐隻check，爛嘅叫佢換比我，攪咗好耐，雖然貴過淘寶，不過起碼confirm冇穿冇爛！開價$680，成交$550

電腦房燈好似下面呢盞，不過冇花紋嘅，未開燈係白色閃閃哋，開咗燈就係幻彩色！簡單得嚟幾靚，開價$130，成交$120，香港賣$298

應該短期內都唔洗再北上喇，再見喇田貝北路．．．．．．可能遲啲會再去寶安北路超凡睇吓家品﹑裝飾品啦！