shopping@超凡﹑藝展中心

今日同牛牛去深圳買田園家品／裝飾品，之前已經上去睇過，再喺淘寶格埋價，因為淘寶要比運費﹑又冇實物睇﹑等收貨又麻煩！所以如果唔係貴好多嘅，我哋寧願自己買咗之後拉車仔落嚟！

今日target係：田園碗碟套裝﹑田園餐具﹑調味盅﹑紫色田園梳化墊﹑田園垃圾桶﹑牙刷杯﹑防潮墊（鞋櫃用）﹑座地廁紙架﹑椅腳套﹑田園冷氣罩﹑馬桶刷．．．．．．梗係冇可能買齊晒啦，不過都叫做滿載而歸啦！

行完藝展中心一期就過去超凡家居，因為藝展中心裝修緊，二﹑三樓啲鋪頭都係執緊貨，唔係好多嘢睇，同埋多數貨品超凡都有得賣！唯一睇中一個旋轉木馬音樂盒，放喺梳妝台一定好靚，不過rmb$150，太貴喇所以冇買！有人買緊所以冇影相呀！

戰利品~~

呢套紫色花花碗碟套裝超中意呀！行晒兩個商場得一間鋪有咋！！仲有特價，一套34件rmb$230

另一間買咗兩個超大嘅咖啡杯，特登揀一藍一粉紅扮一套！$18@

左上角嘅係牙刷杯，$18@

花花餐具，左邊4隻大啲，$7@。右邊4隻細啲，$5@。

調味盅一套三個 $35。原來唔同花紋會唔同價錢，有啲$30，不過我中意呢套！

手繪田園垃圾桶 $50，超愛！成個都係木造，仲有4隻腳同波浪邊，襯晒我間田園屋！一見到就即買，連講價都唔記得添！！

梳化墊70x180cm $70，另一間講完價都要$100，好彩睇多幾間先買咋！冇揀到紫色花花款，因為驚會“娘”，呢個係新款（sales姐姐講嘅）同埋淘寶冇！啲小花花係繡落去架！

牛牛辛苦喇．．．．．．



椅腳套﹑田園冷氣罩﹑馬桶刷都冇買．．．因為椅腳套一包四個$20，淘寶$1.2@！！冷氣罩得米色唔靚！馬桶刷好少款，家合居多啲款，不過今日冇去！

防潮墊﹑座地廁紙架搵唔到．．．應該要淘寶喇！

好唔開心因為之前睇中咗個鳥籠，諗住放個花球入去做裝飾嘛．．．．．．點知賣晒！要遲啲先有貨，到時都唔知仲上唔上去買好！冇理由為咗個鳥籠走多轉嘛．．．．．．不過可能或者買埋個旋轉木馬音樂盒哩！！