馬爾代夫Honeymoon～Day5～Part2：Snorkeling+sunset

原本下午又book咗House Reef Snorkeling，點知一出去見到紅旗呀！！點解呢？唔通太大浪？之前幾日有冇架呢？又好似唔覺眼喎．．．．．．

我哋照樣行去碼頭睇睇，冇人喎，連個activity board都冇show House Reef Snorkeling，唔通cancel咗！？算啦，既然係咁我哋索性返房浮潛喇，反正之前都出咗海兩次啦！

呢條魚魚成日跟住我！因為我攞住個防水袋入面有麵包呀！！

呢條魚好似幾好味！

又喺泳池玩一陣．．．

沖完涼又出去行吓﹑影吓相﹑餵吓魚．．．

連車牌都冇喺度扮晒嘢．．．

又係無敵大海景．．．

對面就係main island

坐喺度吹吓風都幾好

呢個位餵魚好正！

不過小心“甩拖”！

都係除咗拖鞋安全啲！

啲雲幾靚．．．

食咗咁多餐，今日先記得影餐廳門口嘅招牌

餐廳另一邊係bar

水煙．．．我哋冇試，唔知洗唔洗錢！

又扮瞓．．．

無聊．．．

又係碼頭

之後返房等睇日落，途中見到好大粒“海星”喺海上漂浮，係用紙畫架，可能係其中一間房嘅小朋友嘅小玩意！

開始日落喇

最後一日先發現拉開客廳窗簾可以睇日落，蝕咗！！ 不過隔離Premier IOV個泳池同涼亭遮住晒！

等咗好耐日落都唔變紅色!

又上天台睇吓．．．待咗陣．．．個天好似著火咁呀！！

過多一陣又比啲雲遮住晒喇！

7點半夠鐘食晚飯，食咗兩餐buffet，今晚終於又可以食番set dinner喇！吞拿魚多士幾好味，麵包就同之前一樣！

今日出去任攞嘅係炒飯同埋．．．乾炒牛河呀！！ 呢個乾炒牛河真係有驚喜，係牛柳絲呀，加埋辣椒粉／青檸仲正！

今日menu

上面係starter，番茄凍湯配皇帝蟹，下面先係餐湯，加埋出去攞嘅湯．．．飲咗三碗！

main course冇上次咁好，大蝦下面係我最愛嘅南瓜意大利飯，不過好似煮唔熟！牛扒幾好，但係側邊pat芹菜泥凍冰冰好核突！

呢兩日少咗好多guest，之前有5pairs國內遊客走晒，我哋好似包場咁！

今日唔係mango sorbet呀！不過牛牛嘅三色雪糕好味，同上次唔同口味架！

最後一份小禮物係橙味face mist

今日嘅handmade cookie最好味呀！

住4晚有4份小禮物真係好！

床上放咗封信，通知我哋聽日11am check out，3:45pm搭seaplane走，之前有blogger話resort會要求你9點check out，然後安排一間main island beach villa比你hea到夠鐘上機，但係早排再有blogger去已經冇咗呢個arrangement喇，要比us$100 extend到2點 check out！所以我哋一早book定Spa 11:30am-2:pm，之後hea多陣就走啱啱好！

另外仲有張Invoice，us$150 嚇屎我！！！ Green Imperative Fund唔知係咩，一日一蚊美金豪比佢啦！但係過main island食buffet竟然計咗錢，我哋明明係half board包埋嘛，即刻打去reception問，好彩佢哋好快check到係攪錯咗，聽日check out張單會扣番！

聽日就走喇，執定行李先，順便睇吓酒店仲有咩“紀念品”可以拎走！ 原來咩都唔得！樣樣都有晒價錢架！對橙色人字拖著咗幾日我都幾中意，點知要us$10，唔抵！

搵吓搵吓比我搵到兩樣“紀念品”係price list冇寫嘅！即係可以攞走啦！！ 一樣係印咗酒店名嘅原子筆，有兩支！（返到屋企先記得影相）

另一樣係明信片，一set有5張架，夾喺“check in枱”個資料夾入面，大家記得攞呀，好靚架！！

“check in枱”

明信片

執完行李瞓喇．．．．．．