法國婚紗揀相～失敗+失望！

今日我哋一行６人拉大隊去揀相，本來我預算加30張相，點知偷影失敗＋失望而回！

４點左右去到，等到４點半先開始揀，可能見我哋人多，所以安排我哋坐正counter隔離張枱，咁多staff 喺度，梗係一張都偷影唔到啦，同埋揀相揀到好痛苦，根本冇心情偷影！

我哋 total 影咗180張，睇頭幾張都好似幾好，因為赤柱外景個髮型冇預期咁差，影相出嚟效果都可以接受，不過一路睇落去就發覺好多相都係差唔多pose﹑差唔多角度，只係個背景唔同咗，睇到有啲悶！仲有好多張係out focus，有啲本來幾靚不過因為out focus而被迫“捨棄”！去到第２個造型，即係超大拖尾婚紗，竟然冇一張相係影晒成條拖尾，連門口花花鐘樓景都冇影全身“回頭望”個經典pose，咁我點解揀呢條婚紗呢？真係一百個失望！到第３個粉紅晚裝造型，我 request 影嘅瞓梳化pose有三張，不過條裙尾竟然好似一嚿垃圾咁，點解當時cam man冇出聲﹑助手又冇幫我整理吓呢？結果梗係一張都冇要啦，直情係一百萬個失望！！第４件紫色晚裝，本來諗住襯新嗰個白玫瑰佈景會好靚，點知影出嚟啲白玫瑰一啲都唔突出，又係失望！sales話入咗相簿會好啲，問佢有冇sample睇又話冇，所以只係揀咗一張，希望佢冇棍我啦！

我哋睇第一輪只係求其“捨棄”咗廿張勁out focus 同埋牛牛啲單人相（因為牛牛唔like自己單人相），到第二輪已經out 淨五十幾張，再番睇一次得番48張！我個package包38張，而家即係加多10張 $1300，OK啦！揀相過程真係好辛苦，其實我都想要多啲相，不過好多都係可以要可以唔要之間，諗真啲既然啲pose角度都差唔多，咁都唔須要比錢買similar嘅嘢，so唔要就唔要啦！

揀相sales係Winnie Yu（我仲以為會係幫我哋落單嘅sales Christine添，blog友話佢鬆手啲！），Winnie全程都喺我哋後面行嚟行去，不過冇比任何意見，亦都冇制止我哋cut相，可能我哋人多啩！最後佢可能見我哋cut淨咁少相，只係循例咁介紹吓啲design相簿，好似係４千幾同６千幾一本，我話唔考慮因為中意一頁頁大相多啲，佢都冇hard sell，之後轉sell coating，我連價錢都冇聽清楚就reject咗，之後係油畫同提名冊加大，我因為唔擺酒所以全部reject！佢冇黑面，因為佢全程都冇笑過冇表情！！

其實我最concern係點樣可以將48張相入晒相簿，因為blog友話要入相簿嘅相先會執相，即係執走眼袋﹑黑眼圈﹑眼紋﹑粗手臂﹑唧唧肉嗰啲，唔入相簿淨買soft copy就只會調吓光暗顏色，而我個package係大細相簿各入20張相但係要同款！我問Winnie大細相簿入唔同款要加幾錢，佢話加$300，不過入大相簿先會執相，細相簿都係冇執相嘅（我覺得佢棍我囉！），佢sell我加多本大相簿二千幾蚊就可以入晒48張同埋全部有執相，no way！！我寧願搵朋友幫我執，雖然冇FB執得咁好，同埋多數都係睇soft copy，相簿都係收埋喺櫃底！跟住佢開另一個offer，加$1200大相簿就可以入30張，呢個都有啲興趣，不過好似貴咗啲唔係好值，即係每張相比多$120 for執相，佢又唔肯平比我哋！我哋諗咗好耐之後佢又offer 齊頭 $3000揀多兩張相 total 50張﹑細相簿都包埋執相，我哋都覺得ｏｋ，但係辛苦嘅時間又到喇，要喺“捨棄區”揀番兩張相真係好難！揀咗好耐最後都ｏｋ咗，佢又再sell 加 $1200可以兩本相簿有晒coating，都係 no need 囉！我哋想Ｒ埋全部散相有框都唔得，相版最多借５張（我見blog友有７張！），揀埋油畫﹑提名冊﹑散相﹑封面，total 攪咗4個鐘！

最後我哋即係有50個soft copy﹑一本10x14珍珠面大相簿入30張﹑一本6x6 new petite入20張﹑2張8x10（其中一個連框）﹑2張5x7（其中一個連框）﹑20x24油畫﹑20x30提名冊

總支出：$6688(ST1 plan)＋$500(租多套晚裝)＋$3000＝$10188

今次就當rehearsal 囉，可能第一次影，啲表情post都好生梗！其實Winnie聽到我有咁多不滿，都有suggest 我重影，不過牛牛唔係好想，因為又唔係一張都揀唔到，免強都揀到50張（雖然有啲真係要得好免強！），而且又要再book時間，又要辛苦多一日！雖然可以轉cam man，不過都係博多一鋪，除非加$500指定cam man，如果唔係到時又係唔滿意即係搵嚟攪，但係影得靚又會大出血，所以我哋都係決定收貨，留番啲budget去台灣！

講咗咁耐睇吓相先啦！（只係調咗色未大執）

呢張做油畫，影樓啲華麗佈景驚幾年後會覺得娘，呢張自然啲！不過我個咀好白好似有病咁，希望執完相會好啲，都係博一博咋！

Standard pose！不過有海，I like it！但係我個樣好似怪怪哋！



呢張“飛裙尾”其實係失敗咗，不過我覺得有“牛牛拖住我一齊步向未來”嘅feel，所以我堅持揀咗！哈哈～～



原本堅持唔揀公仔房，因為唔中意bear bear，不過牛牛like呢張，冇其他嗰啲咁悶！（不過影得我唔靚！勁方方面！）



呢張純粹影到全條裙！不過冇背景好dry！

７月７日先起貨，效率太低！希望４個月後有驚喜啦！