法國婚紗France Bridal ～ confirm 重影！

尋日成日都好唔開心，越諗越激氣，嗰5張相版重覆睇咗成百次，諗住睇多啲就會覺得順眼啲靚啲！梗係唔會啦，越睇越唔滿意，真係想喊咁滯！比咗一萬蚊就係買咁大個失望！再睇番人哋啲相，就算係相版未執都可以見得人，我嗰輯180張入面，真係好中意嘅都唔夠5張，唉．．．．．．好後悔揀相嗰日冇request 重影，因為一早知道牛牛唔想，但係尋日我終於忍唔住好認真咁問牛牛：「其實你覺得輯相點呀？」牛牛答：「唔．．．可以接受囉，不過係咪同想像中有啲距離呢？」我話：「都幾遠囉！可能我睇得人哋啲相太多！」牛牛答：「咁有冇需要再影過呢？」我話：「真架？？唔驚影過又係麻麻哋即係搵嚟攪，或者好靚咪大穫！！」牛牛答：「咁唔影過你都唔安樂架啦！係就快啲打去法國喇！」牛牛真係了解我！不過慢咗半拍啫，如果佢揀相時已經提出咪唔洗我咁煩囉！仲要比多咗$3000 加啲唔中意嘅相！之後打比落單sales Christine （佢好人好多！），但係咁啱佢放假，佢叫我唔洗咁擔心，話今日下晝返公司問Winnie（揀相sales），睇番我輯相再打比我。

今日等咗半日終於收到Christine電話喇，佢都問咗我好耐點解唔滿意，佢話睇咗我啲相覺得唔係好差，可能係自己對自己要求高啲，睇人哋嗰啲覺得靚啲！佢又問我係咪唔中意咁多唔望鏡頭，咁佢都知？講咗一輪梗係比我重影啦！咁啱有人cancel，所以下星期三就有得影喇！Yeah！

我揀相嗰日加咗$3000嘅offer不變，全部4套衫再影過，有一套晚裝之前係加錢租嘅都唔洗再比錢，Good！不過要自備假眼睫毛and粉撲，同埋舊嗰輯全部相都冇得keep番！cam man助手換人，不過我冇心水所以都冇指定，Christine話會幫我安排，MUA都係Bonny，其實都係博一博咋，因為好多人都話佢好，就比多次機會佢啦！我仲request換埋揀相sales添，我唔想再見到個黑面神！哈哈！

以下係唔滿意嘅地方：

·         角度唔得，影到我矮咗

·         成日試閃燈，笑到硬晒佢先影

·         燈光唔得，太灰暗

·         好多out focus

·         pose差唔多，冇變化

·         太多唔望鏡頭 pose

·         影得塊面大and方

·         影唔到大拖尾，冇整理好裙尾

·         style唔活潑唔夠young

·         冇影長腿pose

·         個妝化到對眼好惡

·         髮型遮唔到面形

·         表情唔自然 （係自己問題！）

始終衰過一次，信心指數已經趺咗５０，今次一定會做足準備不容有失！唔會比自己後悔呀！！

諗諗吓仲賺咗5張相版添！ 不過冇揀到天使翼嗰張，失敗！！

隔咗幾個鐘頭，我又打番比Christine request 換阿Ling幫我化妝，我都知我好麻煩，不過既然同Bonny唔夾，我都想試吓第二個囉，不過阿Ling比人book咗 lu！！