Love House 籌備五 ～ 深圳睇磚﹑燈and 廚櫃

今個月上咗兩次深圳探路，主要睇磚﹑燈同廚櫃！我print 定晒notes上去，鋪頭名同地址﹑產品資料同相﹑地圖，因為牛牛冇參與準備工作，所以就靠晒我呢個路盲喇！ 好彩冇盪失路咋！

磚

寶安北路「家之福」已經可以搵齊我想要嘅全屋磚，之前喺旺角睇定晒款，「家之福」比旺角更多選擇，大概平一半！我中意隻淺灰白玫瑰暗花半拋光地磚，旺角賣$65，「家之福」$32。浴室牆身白色凹凸波波磚，旺角賣$24，「家之福」$13。浴室企缸紫色馬賽克，旺角賣$65嘅款，「家之福」$35。其實我搵咗好耐都搵唔到一隻真係好中意﹑靚到叮一聲嘅紫色馬塞克，但係「家之福」可以自由拼色訂造，一星期左右有貨，價錢一樣！實在太好喇！ 之後去到田貝四路已經唔洗再睇磚喇，慳番啲時間！

呢隻就係凹波波磚，仲有凸波波架！我要淨白色

呢間專賣馬賽克，好多款！！門面都鋪滿馬賽克！

燈

「家之福」啲燈好少款又唔靚，雖然係平，但係揀唔啱！田貝四路「家合居」就多好多款，不過都係大路嘢最多...水晶燈﹑led 燈嗰啲囉！我哋之前睇咗好耐都揀唔到客廳燈，因為牛牛想要Led水晶燈，但係我覺得Led唔襯田園style，好似阿加力水晶燈襯啲，所以一直都冇共識，今次終於揀到喇！係Led＋阿加力水晶燈，仲有紫水晶添，得一間鋪有得賣！

如果想揀特別啲，可以睇吓另一個商場，喺八卦嶺叫「又一居燈飾城」，幾層樓都係賣燈，係朋友介紹嘅，唔知係咪新架呢，好似好少人識，我哋行完寶安北路之後搭的士去到門口落$10，嗰度有啲款係寶安北路﹑田貝四路冇架，雖然係貴啲，但都平香港好多！我之前就係喺度睇中盞三頭飯廳吊燈，不過都幾貴，又係得一間鋪有得賣！！

就係呢盞Led 阿加力水晶燈喇，減咗價都要$700！後面盞Led星星月亮燈都幾靚，可能for電腦房

之前睇中嘅飯廳吊燈，未講價$680

廚櫃
我想整田園feel open kitchen，問咗歐森同嘉怡廚櫃，嘉怡的確係貴啲，要$1480/米， 歐森$1180/米，其他濕碎嘢eg. 星盤﹑雕花裝飾都貴少少，運費安裝仲誇張，歐森係$1900運費連安裝，嘉怡安裝要$2300，運費另計，按重量$500-$600！不過嘉怡有shop喺將軍澳，可能係HK cf 所以貴啲！

吊櫃同地櫃中間嗰截我唔想鋪瓦仔，想用強化玻璃，一來靚啲，二來易清潔，香港裝修公司報價$6800連安裝（貴到嚇死人！），歐森話做唔到強化玻璃，冇咁大塊，一係就分幾塊裝（咁咪好樣衰？）佢suggest用不锈綱板 $850，香港不锈綱板報價要 $4800（食水好深！！）不過我覺得不锈綱板唔係好襯田園feel！至於嘉怡，佢做到強化玻璃，只係around $680，cf 度尺就埋電制位再報實價，佢唔suggest用不锈綱板，佢話大陸啲不锈綱唔係靚料同埋貴過香港！

成套吊櫃地櫃，用吸塑板，內裡大芯板，普通人造石面，連埋不綉鋼星盤﹑拉藍﹑油壓較﹑手抽﹑微波爐櫃﹑運費安裝，歐森 rmb$7600（中間用不锈綱板），嘉怡 rmb$9500（中間用強化玻璃），我諗我會揀嘉怡，雖然貴 $2000，計番港紙要一萬蚊！不過有cf 喺香港，有咩事都可以踩入將軍澳找佢晦氣，最緊要係做到我想要嘅強化玻璃，香港做要 $21000呀，咁都慳咗一萬！

*** 註：嘉怡香港店收番香港價錢，所以一定要上深圳落單！

理想中的田園廚櫃！