法國婚紗揀相 take two～～76個滿意！

等咗個幾禮拜，前日終於又去揀相喇！出血成功，Yeah！！

Sales唔係上次個黑面神，係Clara。6點9開始睇相，嘩！26x張！（上次連埋out focus 嗰啲先得18x張）今次輯相大部份都好滿意，特別係海灘同水池嗰啲，超愛！（可能因為有水啫！）喺沙灘我要拎起條裙防止整濕，阿安係咁話我拎得太高露晒條打底褲出嚟，好彩睇相又冇穿崩喎！！ 同埋阿安會喺同一個景影好多唔同pose唔同角度，所以差唔多每個景都一定會揀到相！仲有影咗好多飛裙尾，我都要咗好多！只有2個景冇揀，一個係酒吧街，因為好多路人甲同埋冇咩特別！另一個係美利樓二樓，阿安上三樓向下影我哋，嗰幾張係全日影得最辛苦，扭到頸都斷咁滯又勁凍，不過影得我方方面﹑表情生梗，真係好想揀一張留念都揀唔落手，失望！最後件紫色晚裝都揀得唔多，因為影到7﹑8點，個樣勁累！嘥晒條裙咁靚，可惜！唯一唔滿意係影咗好多張义腰pose，好似好娘！只係揀咗一張！

上次out 相攪咗好耐，因為好多都係景同衫靚但係個樣同pose唔靚，所以相同景嗰啲要諗好耐！今次改變策略，第一 round 用最怏速度睇一次所有相，大概知道影咗咩景﹑每個景有幾多張。第二 round 盡情地cut 相，cut 淨11x張。其實如果唔係下個月要影台灣，呢百幾張係可以要晒嘅，不過我知道台灣比香港更凶險，所以要忍痛再cut！第三 round 就揀啲同景唔同pose嘅二選一or三選一，最後淨番68張，另外之前嗰輯借咗5張相版一定要keep番，即係total 73張。呢三 round cut 相只係用咗個幾鐘。Clara全程都陪住我哋揀！（即係偷影失敗！）佢都有比好多意見，唔係張張都話靚嗰啲意見，係當有幾張差唔多款，我又病發揀唔到佢就會幫我揀，所以慳好多時間，可能佢都趕住收工啦！

之後揀油畫﹑提名冊﹑散相都好快。上次揀提名冊攪咗好耐，我哋揀親張張黑面神都話唔好，又太大又太細又左右唔啱位，但係又唔講應該揀咩款先啱，激死！今次一話揀提名冊我就話：「死喇，有排攪！」，點知Clara話：「唔會！我已經幫你諗咗喇！」oh．．．太好喇，嗰張相仲影得我好靚女架！！（自戀狂）

下一part 玩咗最耐，就係講價！

回顧吓我之前個plan先：50個soft copy（原本38個，加咗12個）﹑一本10x14珍珠面大相簿入30張﹑一本6x6 new petite入20張﹑2張8x10（其中一個連框）﹑2張5x7（其中一個連框）﹑20x24油畫﹑20x30提名冊

我今次concern 嘅同上次一樣，就係點樣可以將加嗰23張相都入埋相簿，因為要入相簿先會執相！其實我一早預咗會加相，因為影完之後都對阿安幾有信心，所以我諗定加10張budget 係幾多﹑加20張budget 係幾多﹑加30張budget 係幾多．．．Clara開咗2個offer：

Plan 1．$4000，加23張相，將大相簿轉無縫有排版相簿有coating入40張﹑細相簿加厚入33張（細相簿最盡入33張），2張散相有埋coating連框

其實我覺得唔貴，不過重點係我上次已經加咗$3000，仲要咩都Ｒ唔到，而家又比多$4000 咪即係 total $7000！over budget，唔制！

Plan 2．$3888，加23張相，加多本細相簿入埋嗰23張，2張散相有埋coating連框

呢個完全唔考慮，細相簿都唔值錢又唔靚，有blog友買得多相可以免費送添!

跟住我問Clara上次加12張相係計$130@，咁而家係咪可以減番$240比我？因為我今次加多23張，total 即係加咗35張喎，over 30係計$110@嘛！佢梗係唔肯啦，佢話上次比晒錢今次當新單計！咁我諗住再cut相，咁唔洗加咁多錢入相簿，點知．．．cut 相變咗加相！仲揀多咗3張添，激死！

跟住Clara比多個offer：

Plan 3．$3500，加26張相，大相簿轉有排版相簿不過有縫冇coating入40張，細相簿加厚入33張，2張散相有埋coating連框，剩餘3張散相4" x 5" 唔入相簿（因為嗰3張係之前借嘅相版一定要keep，其實我唔係好中意！）

原來大相簿入30張一頁一張同入40張有排版有縫冇coating嘅價錢係一樣，上次黑面神都冇講！其實 Plan.3都ok，因為我覺得有冇coating都冇所謂，但係有排版就好睇好多，因為阿安影咗啲一連幾張好似故事形式嘅，一定要買晒幾張放埋一頁先好睇！不過我都係覺得貴，叫佢減番$240又唔肯，比多2張相版又唔得，送2R相又話冇！

跟住我同牛牛商量不如再cut 相，淨係入晒相簿，其他咩都唔要！咁我自己諗咗2個offer：

Plan 4．$2830，加23 張（23 x $110），加$300細相簿入33張，大相簿有排版有縫冇coating入40張

Plan 5．$1860，加13張，（13 x $120），加$300細相簿入33張，大相簿照舊一頁一張入30張

Clara聽到竟然話：「你哋cut 到就cut 啦，真係冇得再平喇！」．．．．．．但係我真係一張都唔想cut 呀！！

Clara手提都嚮咗2次，有人問佢放工未，嗰時差不多10點喇，我哋死 "lur"要佢減多少少﹑又賴死唔走﹑死都唔揀相入相簿，佢竟然行開由我哋自己諗！既然佢寧願我哋cut 相﹑寧願唔放工都唔肯再減，咁我哋唯有就範囉！最後要咗 Plan 3.$3500，其實 Plan 1.$4000都好抵，比多$500本相簿可以做埋無縫有coating，不過就少咗3張相囉，所以都係慳番$500！

牛牛成晚都冇咩出聲，到比錢一刻佢終於發揮作用喇～～佢叫Clara比7張相版，Clara唔肯，跟住牛牛話6張啦，得咗！！ 之後揀相入大細相簿又係好快，Clara幫我哋揀晒咁滯，將啲有連貫性嘅3-4張咁揀，佢話到時師父見到就識排！連埋揀相版﹑出單都係半個鐘左右！

最後我有大發現，就係做油畫嗰張相，我啲頭髮飛起咗，問佢可唔可以執走，佢話唔suggest執頭髮，會好假唔好睇，咁我叫佢執咗比我睇睇先再諗，咁又多咗張相版，哈哈！！ 如果唔ok就轉另一張做油畫，所以揀定一張做後備。最後攪掂晒係10點9，足足玩咗四個鐘，Clara仲好nice冇黑面！其實淨係計今次個offer都好似好抵，不過因為我上次比貴咗，所以平均計番都冇咩著數！

要7月25日先收貨，真係等死人！！我將會收到：

76個soft copy﹑一本10x14珍珠面有排版大相簿入40張﹑一本 6x6 new petite入33張﹑3張 4" x 5"相紙﹑2張 8x10連框﹑2張 5x7連框﹑20x24油畫﹑20x30提名冊

Total expense：$6688(ST1 plan)＋$500(租多套晚裝)＋$3000＋$3500=$13688

尋日等咗成日，打咗成十次電話比Clara，到夜晚先收到相版，因為file太大，佢send 咗幾次email 我都收唔到！到夜晚先攪掂，真係急死我！等到頸都長埋！！

相版駕到～～

呢張做油畫，其實冇咩特別，不過睇落好舒服，睇幾年都唔怕out ！本來有束頭髮飛咗出嚟喺我個頭同牛牛塊面中間，而家執走咗，其實執唔執走都差唔多！

呢張本來無揀，越睇越中意，喺“捨棄區”揀番出嚟！就係揀咗呢張做後備油畫，後面有橙色燈幾靚，又影到條婚紗！改呢張做油畫好唔好呢？

呢張做提名冊，係Clara揀架，好似好sweet咁，影得個花球好靚

飛裙尾，I like it！

呢張好特別！不過我望住牛牛好似合埋眼咁，如果唔係就perfect喇！

終於都有得瞓水池喇！（上次冇影！！）

呢張幾得意，仲有Monchhichi 襟花添！

紫色晚裝冇揀到相版，因為個樣好殘！希望FB高超嘅執相技術會幫到我！到時收相先比大家睇啦！