Love House 籌備三 ～ 田園燈飾

既然Love House走白色田園風，當然燈飾都要襯番啦，但係我唔係太中意水晶燈，因為太難清潔喇，所以就主力睇田園feel嘅燈，即係地中海/波希米亞/韓式田園/歐式田園/白色田園系列，都係果類型。雖然已經縮細咗範圍,不過依然好難揀，因為實在太多款喇，同埋房and廳想一樣但係又唔想太一模一樣！（我都知我好麻煩！）

經過一輪淘寶格價之後，上星期日我哋就去咗深圳睇實物，行咗寶安北路﹑田貝四路同埋又一居燈飾城。寶安北路唔係太多款但係平，田貝四路多數水晶燈，又一居燈飾城好似好少blog友去，係朋友介紹嘅，不過有啲款係寶安北路﹑田貝四路冇架喎！

我嘅候選名單入面竟然揀咗三﹑四十盞燈，暫時勝出名單如下：

睡房燈 -（淘寶價$260）

睡房梳妝台壁燈 -（淘寶價$100）

睡房門口玄關位 -（淘寶價$198）（又一居燈飾城 $360未講價）

以上三款好match！超愛支壁燈，望落去好舒服，簡單唔太花巧 　睡房門口玄關位可能整埋假天花加射燈就唔洗自己買燈，不過呢支玫瑰花燈又好似幾特別喎！

阿B房係最難揀，因為暫時係電腦房，又唔知第時係B仔定B女用，又唔知阿B咩taste，我知我諗得太多，牛牛都話我成日製造問題，又有選擇困難証，條條問題都唔識答．．．．．．

不過最後我諗到喇！就係以下呢款，雖然都係女仔啲，不過因為決定咗兩間房都油淺紫色，呢款都幾襯淺紫色天花吖！第時B仔唔中意先換囉，哈哈～

阿B房／電腦房燈 - $280（淘寶價）

飯廳我覺得好襯用吊燈，3支或者6支．．．．．．其實我哋屋企冇飯廳，只有open kitchen！！哈哈，咁咪open kitchen用吊燈囉，雖然好少人廚房用吊燈，牛牛又話驚唔夠光，又驚我呢個盲妹會切親手，不過我堅持要吊燈，仲好快比我揀到款添！

廚房燈 - $518（淘寶價）（又一居燈飾城 $680未講價）

梗係揀白色啦！呢張相睇唔清楚，實物靚好多，唔係膠架，係鐵藝通花，不過都幾貴!

大廳燈

其實我想廳燈襯番廚房同睡房用白色，全屋都係白色燈好似一致啲，不過牛牛竟然話想用led水晶燈，因為有紫色led！咁我唯有比佢話事囉，但係我只有一個意見，就係要圓形唔要方型！

類似下圖款式，不過未揀定（其實都幾靚，但係我唔係好想，因為唔襯田園風！）

原本我揀咗呢盞架！不過亞加力膠好似流流哋！